Олий Мажлис Қонунчилик палатасининг Меҳнат, соғлиқни сақлаш ва ижтимоий масалалар қўмитасида 21 май куни миграция жараёнларини бошқариш тизимини такомиллаштиришга қаратилган қонун лойиҳаси дастлабки тарзда кўриб чиқилди.
Мазкур қонун лойиҳаси билан Вазирлар Маҳкамаси ҳузуридаги Миграция агентлиги Ўзбекистондан ташқарида иш қидираётган шахсларни ишга жойлаштириш бўйича фаолиятни лицензиялаш, лицензия талаблари ва шартларига риоя этилишини назорат қилиш борасида ваколатли орган этиб белгиланмоқда.
Шунингдек, хусусий бандлик агентликларига хорижда вақтинча меҳнат фаолиятини амалга ошириш истагида бўлган фуқароларни касб-ҳунарга ва чет тилларига ўқитиш бўйича ўқув курсларини ташкил этиш ҳамда ушбу жараёнга ҳамкор хорижий иш берувчиларни жалб қилиш ҳуқуқини бериш назарда тутилмоқда.
Бундан ташқари, хусусий бандлик агентликлари томонидан лицензия олиш учун захира қилиниши лозим бўлган маблағлар миқдорини камайтириш таклиф этилмоқда.
Қонун лойиҳаси ташаббускорларининг таъкидлашича, белгиланаётган нормалар хорижда вақтинча меҳнат фаолиятини амалга ошириш истагида бўлган Ўзбекистон фуқароларининг ҳуқуқларини ҳимоя қилишга, соҳага хусусий секторни янада кенгроқ жалб қилишга ҳамда кўрсатиладиган хизматларни рақамлаштиришга хизмат қилади.
Қонун лойиҳаси сиёсий партиялар фракциялари муҳокамасига киритиш учун тайёрланмоқда.
Ўзбекистонда айни пайтда лицензия асосида фаолият олиб бораётган хусусий бандлик агентликлари сони 25 та. Миграция агентлиги республика миллий манфаатларини инобатга олган ҳолда, Ўзбекистон фуқароларининг меҳнат миграцияси жараёнларини тартибга солиш ва уларни хорижга ташкиллаштирилган ҳолда юбориш тартиби тўғрисидаги халқаро ҳуқуқ нормалари ва қоидаларига асосланган фаолиятни амалга оширади.
Изоҳ (0)