Наманганда 63-халқаро гуллар фестивали бошланди. Бу ҳақда “Дарё” мухбири Азизбек Абдувалиев хабар бермоқда.
Байрамни анъанавий тарзда автопарад бошлаб берди.
Наманган халқаро аэропортидан йўлга чиққан 200 дан ортиқ гулларга бурканган автомобиль бир соатдан ортиқ вақт давомида шаҳарнинг марказий кўчаларини айланиб, Бобур боғи олдига етиб келди.
Бу ерда фестивалнинг тантанали очилиш маросими бўлиб ўтди. Унда Наманган билан биродарлашган вилоят ва шаҳарлар раҳбарлари, дипломатик корпус вакиллари, ўнлаб хорижий ва маҳаллий ОАВ мухбирлари иштирок этди.
Меҳмонлар вилоят ҳокими Шавкат Абдураззақов ҳамроҳлигида Бобур ва “Афсоналар водийси” боғларини айланиб чиқди, гул композициялари билан танишди.
Фестивалнинг бадиий саҳналарида Ўзбекистон халқ артисти Ёдгор Саъдиев, хонанда Озода Нурсаидова ва бошқа эстрада юлдузларининг чиқишлари олқишлар билан қарши олинди.
Маълумот учун, халқаро гуллар фестивали доирасида вилоят марказида 45 миллион тупдан ортиқ турли гул кўчатлари экилди. Улардан 30 миллиондан ортиғи бевосита Бобур боғидан ўрин олган.
Изоҳ (0)