ДХХ ҳаж зиёратига сайёҳлик фирмалари орқали юборишни ваъда қилган шахсларни қўлга олди

Давлат хавфсизлик хизмати томонидан фуқароларни ҳаж зиёратига юборишни ваъда қилиб, уларнинг пул маблағларини ўзлаштирган шахслар ушланди.

Қайд этилишича, ДХХ томонидан Бош прокуратура ҳузуридаги департамент ва ички ишлар органлари билан ҳамкорликда бир нечта тезкор тадбирлар ўтказилган.

Жумладан, Тошкент шаҳрининг Яккасарой туманида жойлашган сайёҳлик фирмасининг икки нафар ходими маҳаллий фуқаронинг ишончига кириб, унинг ота-онасини Саудия Арабистонига ҳаж сафарига боришлари учун талаб этиладиган виза ҳужжатларини тайёрлаб бериш ва уларни зиёратга юбориш эвазига 18 минг доллар талаб қилиб, 4,5 минг доллар олган вақтида ушланган.

Тошкент шаҳрининг Юнусобод туманидаги сайёҳлик фирмаси раҳбари Яшнобод туманида яшовчи фуқарони “Ҳаж-2024” мавсумида Саудия подшоҳлигига муборак сафарга юбориш эвазига 9,5 минг доллар талаб қилиб, 5,7 минг доллар олган вақтида ушланган.

Шунингдек, Шайхонтоҳур туманида яшовчи, муқаддам судланган шахс ҳам Сурхондарё вилоятининг Шеробод туманида истиқомат қилувчи икки нафар фуқарони сайёҳлик фирмаси орқали ҳаж зиёратига юбориш эвазига 20 минг доллар талаб қилиб, 10 минг доллар олган вақтида ушланган.

Фарғона шаҳридаги сайёҳлик фирмаси иш юритувчиси эса Тошлоқ туманида яшовчи фуқарони ва унинг икки нафар вояга етмаган фарзандини 30 минг доллар эвазига ҳаж зиёратига юборишни ваъда қилиб, 15 минг доллар олган вақтида қўлга олинган.

Фарғона вилоятининг Ёзёвон туманида яшовчи шахс ҳам Қува туманида истиқомат қилувчи фуқарони ва унинг ота-онасини ҳаж амалларини бажаришлари учун сайёҳлик фирмаси орқали Саудия Арабистонига юбориш эвазига 16 минг доллар олган вақтида ушланган.

Ҳозирда мазкур шахсларга нисбатан жиноят ишлари қўзғатилиб, тергов ҳаракатлари олиб борилмоқда.

Вазирлар Маҳкамасининг 2017 йил 7 июндаги “Ҳаж ва умра тадбирларини ташкил этиш ва ўтказишни янада такомиллаштириш чора-тадбирлари тўғрисида”ги қарорида фуқаролар учун ҳаж тадбири Дин ишлари бўйича қўмитаси ва Саудия Арабистони подшоҳлигининг ҳаж ва умра вазирлиги ўртасида ҳар йили имзоланадиган шартнома асосида Ўзбекистон мусулмонлари идораси томонидан амалга оширилади ҳамда бундай фаолият билан бошқа ташкилотларнинг шуғулланишига йўл қўйилмайди, деб белгилаб қўйилган.

Шунингдек, Саудия Арабистони томонидан белгиланган тартибга мувофиқ, чет эл фуқаролари учун ҳаж зиёратини адо этишнинг асосий шарти – ҳаж визасига эга бўлиш ҳисобланади. Қолган барча турдаги визалар – “умра”, “туризм”, “бизнес” ва бошқалар билан “Ҳаж” зиёратига бориш тақиқланади. Тартибни бузган хорижлик Саудия Арабистонидан депорт қилиниб, ушбу мамлакатга 10 йил муддатга кириши тақиқланади ҳамда 50 минг саудия риёли миқдорида жаримага тортилади.