Шавкат Мирзиёев 1 апрель куни Хитой Халқ Республикаси Коммунистик партияси Марказий қўмитаси Халқаро алоқалар бўлими мудири Лю Сзянчао бошчилигидаги делегацияни қабул қилди.
-2CHkmotS.avif)
Президент матбуот хизматининг билдиришича, юқори мартабали меҳмон давлат раҳбарига Хитой Раиси Си Цзиньпиннинг саломи ва тилакларини етказди. Учрашувда олий даражада эришилган келишувларга мувофиқ Ўзбекистон билан Хитой ўртасидаги кўп қиррали ҳамкорлик ва амалий шерикликни янада кенгайтириш масалалари кўриб чиқилди. Кейинги йилларда Ўзбекистон—Хитой дўстлик ва барча шароитларда ҳар томонлама стратегик шериклик муносабатларида юксак даражага эришилгани қайд этилди.
Ўзаро товар айирбошлаш ва инвестициялар ҳажми барқарор ошиб бормоқда, иқтисодиётнинг устувор тармоқларида етакчи компаниялар иштирокидаги қўшма лойиҳа ва корхоналар сони кўпаймоқда. Хитой—Қирғизистон—Ўзбекистон темирйўлини қуриш лойиҳаси бўйича амалий ишлар олиб борилмоқда.
Фаол ҳудудлараро алоқалар ва маданий-гуманитар алмашинув юқори баҳоланди. 2025 йилда навбатдаги ҳудудлар форуми ва Таълим форуми бўлиб ўтади.
Парламентлараро ва партиялараро ҳамкорликни, айниқса, камбағалликни қисқартириш, коррупцияга қарши курашиш, рақамлаштириш ва саноатлаштиришни жадаллаштириш каби соҳаларда янада кенгайтириш зарурлигига алоҳида эътибор қаратилди. Олий ва профессионал таълим соҳасида ҳамкорликни янада ривожлантириш, жумладан, Ўзбекистонда Хитойнинг етакчи олий таълим муассасалари филиалларини очиш муҳимлиги қайд этилди.
Изоҳ (0)