Ижтимоий тармоқларда Сурхондарё вилоятида аҳоли турар жойига айиқ келиб қолгани акс этган видео тарқалганди. Экология, атроф-муҳитни муҳофаза қилиш ва иқлим ўзгариши вазирлиги ҳолат юзасидан маълумот берди.
Унда айтилишича, 15 май куни Сурхондарё вилояти Сариосиё туманидаги “Жаннатмакон” МФЙ ҳудудига кутилмаганда айиқ келиб қолган. Йиртқич ҳайвон аҳоли турар жойларига кириб, инсонлар ҳаётига хавф туғдирган. Айиқни зарарсизлантиришга ҳаракат қилишган, аммо йиртқич тажовузкорликни ошириб, ИИБ ходимларидан бирига ташланган ва жароҳат етказган.
Бундан ташқари, айиқ 74-сонли мактабга кириб, ўқувчилар ҳаётига хавф солган.
“Ҳолат кутилмаганда юз бергани, айиқ жуда тажовузкор ҳаракат қилгани ва мактаб ўқувчилари ҳаётига хавф туғдиргани сабабли тезкор чора кўриш талаб қилинган ва йиртқич отиб ўлдирилган”, — дейилади хабарда.
Айиқ жароҳат етказган ИИБ ходими эса тиббий текширувдан ўтказилмоқда.
Изоҳ (0)