Тошкент вилояти Паркент туманида айиқ озуқа излаб аҳоли яшайдиган ҳудудга келди. Бу ҳақда Экология вазирлиги ахборот хизмати хабар берди.
Маълум қилинишича, Тошкент вилояти Экология бошқармаси Паркент тумани бўлимига 21-сентябр куни соат 09:30 ларда Паркент туманининг тоғли қишлоқларидан бири бўлган “Сўқоқ” қишлоғининг “Тосар” ҳудудидаги “Сўқоқ Лазиз Соли” фермер хўжалиги ер майдонларига 20-сентябр куни тунда Тян-Шан қўнғир айиғи келиб қолгани ҳақида мурожаат келиб тушди.
2023 йилда қиш фасли совуқроқ келгани сабабли тоғли ҳудудлардаги айрим мевали дарахт ва буталарни совуқ уриб, ҳосил жуда камайиб кетган. Натижада айиқ озуқа излаб, аҳоли яшаш пунктига тушиб келган ва фермер хўжалигига тегишли бўлган 14 бош қўйдан 2 тасини олиб кетган. Бир бош қўй ярадор қилинган.
Мурожаатга асосан Тошкент вилояти Экология бошқармаси Паркент тумани бўлими ходимлари ва Wildlife зопитомниги ходимларидан иборат ишчи гуруҳ воқеа жойига бориб, ҳолатни ўрганди. Ўрганиш натижасида “Сўқоқ Лазиз Соли” фермер хўжалиги ер майдонида қўйларга мўлжалланган қўра ёғочлари сингани маълум бўлди.
Ушбу ҳудудда дала шийпонларида яшовчи 4 та оила 30 дан ортиқ қора мол, қўй ва эчкилари билан бирга ўзларининг яшаш хонадонларига кўчириб юборилди.
21-сентябрдан бошлаб айиқ тушиб келган ҳудуд Паркент тумани Экология бўлими, Wildlife МЧЖ ходимлари ҳамда Паркент тумани ИИБ нозирлари томонидан доимий назорат қилинмоқда. Ҳозирча ҳеч қандай айиқ ёки бошқа ёввойи ҳайвонлар кузатилмади.