Америкалик машҳур қўшиқчи Граймс ва Силикон водийси стартапи Curio ChatGPT’нинг Open АI технологияларидан фойдаланган ҳолда болалар билан гаплаша оладиган дунёдаги биринчи ўйинчоқларни тақдим этди.
Curio компаниясининг таъкидлашича, бундай ўйинчоқлар узоқ муддатли интерактив мулоқотга қодир бўлиб, бола ўйинчоқни дўст сифатида қабул қила олади.
“Технологиядаги ҳар қандай ўзгариш ўйин-кулгининг янги шаклларини яратади. Бу ўйинга шўнғишнинг бошқа даражаси бўлади”, — дейди Сэм Итан Curio компаниясининг президенти ва бош ўйинчоқ ишлаб чиқарувчиси.
Ўйинчоқларга хонанда Граймс номи билан танилган Клер Элис овоз берган. У шунингдек, Curiо’нинг инвестори ва маслаҳатчиси ҳисобланади.
Грaймснинг сўзларига кўра, сунъий интеллект ўйинчоқлари дастлаб унинг учта фарзанди учун яратилган.
Тhе Washington Post нашрининг ёзишича, олимлар ва сармоядорлар сунъий интеллект ўйинчоқларининг болаларга эҳтимолий таъсирига ҳали эрта эканлигини айтди, лекин прогнозларга кўра, яқин йилларда бундай ўйинчоқларнинг оммалашиши кутилмоқда.
“Ота-оналар ҳар доим ўз фарзандларига ўрганиш ва ривожлантиришга ёрдам берадиган ўйинчоқларни сотиб олишни хоҳлайди ва бу сунъий интеллектга эга ақлли ўйинчоқларни тобора оммалаштиради”, — дейилади Contrive Datum Insights тадқиқотлар компанияси ҳисоботида. Шунингдек, сунъий интеллект ўйинчоқлари бозори 2030 йилга бориб, 35,11 миллиард долларга етиши мумкинлиги қайд этилган.
Ўйинчоқнинг учта модели мавжуд: Gabbo, Grem ва Grok. Ўйинчоқларни расмий веб-сайтдан 99 долларга буюртма қилиш мумкин. Товарлар 2024 йилнинг биринчи ойидан мижозларга етказиб берила бошлайди.
Изоҳ (0)