Сўнгги кунларда Ўзбекистон ҳудуди ёз учун жуда қулай ҳарорат фонида нам ҳаво массалари таъсири остида бўлди, 13 июндан бошлаб эса жанубдан қуруқ ва бир оз иссиқ ҳаво кириб келиши бошланади, деб хабар бермоқда “Ўзгидромет”.
Прогнозларга кўра, асосан, кам булутли об-ҳаво кузатилади ва ҳаво ҳарорати аста-секин кўтарилади. Жума куни кундузи ҳарорат 33-35 даража бўлади, дам олиш кунлари 36-38 даражагача, шимолда, жанубда ва чўл ҳудудларида эса 40-42 даражагача кўтарилади.
Республика бўйича баъзи жойларда шамол тезлиги 13-18 метр/секундгача кучайиши, айрим жойларда чанг-тўзон билан кузатилиши мумкин.
Айрим тоғли ҳудудларда қисқа муддатли ёмғир ёғади, момақалдироқ кузатилади. Тоғолди ва тоғли ҳудудларда сел-сув тошқини ҳодисалари юзага келиши мумкин.
Тошкентда асосан кам булутли об-ҳаво бўлади, ёғингарчилик кутилмайди. Ҳарорат жума куни кундузи 35 даража атрофида, дам олиш кунлари 36-38 даража бўлади.
Санитария-эпидемиологик осойишталик ва жамоат саломатлиги қўмитаси ёзнинг жазирамасида қандай кийиниш кераклиги бўйича бир неча тавсиялар берганди.
Изоҳ (0)