Ўзбекистонда 10 мартдан бугунги кунга қадар жами 4 419 км таъмирлаш ишлари амалга оширилди. Бу ҳақда АОКАда ўтказилган брифингда Автомобиль йўллари қўмитаси Ахборот хизмати раҳбари Нилуфар Жумаева маълум қилди.
Унга кўра, бугунги кунда мамлакат ҳудудида мавжуд 42 371 км узунликдаги умумий фойдаланишдаги автомобиль йўлларида куз-қиш мавсумидан кейин ҳосил бўлган нуқсонларни бартараф этиш мақсадида таъмирлаш ишлари жадал равишда олиб борилмоқда.
Жорий йилнинг 10 март кунидан бугунги кунига қадар жами 4 419 км таъмирлаш ишлари амалга оширилиб, бу ишларга 33 870 тонна асфалт-бетон қоришма сарфланган.
Шундан, халқаро аҳамиятдаги 657 км автомобиль йўлини таъмирлаш учун 9 461 тонна асфалт-бетон, давлат аҳамиятидаги 1 899 км автомобиль йўлини таъмирлаш учун 14 676 тонна асфалт-бетон, маҳаллий аҳамиятдаги 1863 км автомобиль йўлини таъмирлаш учун 9 734 тонна асфалт-бетон қоришмаси ётқизилган.
Тошкент шаҳрида йўлларни таъмирлаш ишлари билан боғлиқ харажатларни амалга ошириш учун 12 миллиард сўм ажратилиши айтилганди. Ҳар битта туманга 1 миллиард сўмдан тақсимланади.
Таҳлил натижаларига кўра, 2025 йилда жорий ва капитал таъмирлаш талаб қилинадиган кўчалар рўйхатини ўз ичига олган манзилли таъмирлаш дастури ишлаб чиқилди. Дастур доирасида умумий майдони 65 минг квадрат метрдан ортиқ бўлган йўлларни таъмирлаш режалаштирилган.
2025 йил январида Тошкентнинг Яшнобод туманида Кичик ҳалқа автомобиль йўлининг Махтумқули кўчасига туташган қисмини қайта қуриш ишлари ниҳоясига етказилганди. Ишлар доирасида 5700 метр квадрат йўл қопламаси ётқизилди. Шунингдек, 800 метр сув чиқариш лотоклари ўрнатилди. Шу билан бирга, 1825 метрга бордюр тоши қўйилди.
Изоҳ (0)