O‘zbekistonda suv xo‘jaligi sohasida huquqbuzarlik holati haqida xabar berganlar rag‘batlantiriladi

Suv xo‘jaligi vazirligi “Suvdan foydalanish va uni muhofaza qilish ustidan davlat nazoratining samaradorligini oshirish bo‘yicha qo‘shimcha chora-tadbirlar to‘g‘risida”gi hukumat qarori loyihasini muhokamaga qo‘ydi.

Hujjatga muvofiq Suv xo‘jaligi vazirligi, Ekologiya, atrof-muhitni muhofaza qilish va iqlim o‘zgarishi vazirligi, Qishloq xo‘jaligi vazirligining suv xo‘jaligi sohasida huquqbuzarlik holatlari bo‘yicha fotosuratlar va (yoki) videoyozuvlarni yuborgan shaxslarni:

• har bir tasdiqlangan holat bo‘yicha huquqbuzardan undirilgan mablag‘lar hisobidan pul mukofoti bilan rag‘batlantirish;
• ma’muriy jarima bilan bog‘liq bo‘lmagan boshqa jazo chorasi qo‘llangan hollarda Vazirlar Mahkamasining “Fuqarolar va jamoat tashkilotlarini huquqbuzarliklar profilaktikasi va jinoyatchilikka qarshi kurashishdagi faol ishtiroki uchun rag‘batlantirish tartibi to‘g‘risida nizomni tasdiqlash haqida”gi qaroriga muvofiq rag‘batlantirish to‘g‘risidagi taklifiga rozilik beriladi.

Belgilanishicha:

• Suv xo‘jaligi vazirligi huzuridagi Suv xo‘jaligi obyektlari xavfsizligini va suvdan foydalanishni nazorat qilish inspeksiyasining xodimlari xizmat majburiyatlarini bajarishda maxsus formali kiyim-bosh kiyib yurishlari va tegishli farqlash belgilarini taqishlari;
• formali kiyim-bosh va farqlash belgilari bilan ta’minlash bilan bog‘liq xarajatlar davlat byudjeti mablag‘lari hisobidan qoplanadi;
• Suvdan foydalanish va uni muhofaza qilish ustidan davlat nazoratining samaradorligi oshirish maqsadida inspeksiya xodimlari 142 ta skuter yoki uning muqobili bilan ta’minlanadi.

Eslatib o‘tamiz, 2022-yilda O‘zbekistonda qorovullik xizmatlari huquqbuzarlik haqidagi xabarlar uchun moddiy rag‘batlantirilishi to‘g‘risida xabar berilgandi.