Олмаота Марказий Осиёдаги яшаш энг қиммат бўлган шаҳарга айланди. Numbeo таҳлили хизмати 2024 йил январь ойи якунлари бўйича қиммат шаҳарлар рейтингини эълон қилди.
Олмаотада яшаш қиймати индекси 36,2, уй-жой ижараси эса 19,5га тенг. Мегаполис бундай кўрсаткичлар билан Остона, Тошкент ва Бишкекни ортда қолдирди. Бу шартли индекс бўлиб, 100 фоизлик базавий кўрсаткич билан Нью-Йоркка нисбатан маълум бир шаҳарда ҳаёт қанчалик арзон ва қимматроқ эканини кўрсатади. Мисол учун, яшаш қиймати индекси 120 бўлган шаҳар Нью-Йоркдан 20 фоизга қимматроқ, яшаш қиймати индекси 80 бўлган шаҳар эса 20 фоиз арзонроқ.
Шундай қилиб, асосий кўрсаткичга нисбатан яшаш нархи шаҳарлар ўртасида таққосланади. Индекс истеъмол товарлари, озиқ-овқат, ресторанлар, транспорт ва коммунал хизматлар нархларини ҳисобга олади. Бунга ижара ёки ипотека каби яшаш харажатлари кирмайди.
Шу тариқа Олмаота (36,2) бу кўрсаткич бўйича Марказий Осиёдаги шаҳарлар орасида етакчилик қилмоқда, ундан кейинги ўринларни Остона (34), Тошкент (28,5), Бишкек (28,3) эгаллаган.
Тошкент шаҳрида яшаш нархининг қисқача хулосаси:
- Тўрт кишидан иборат оиланинг ойлик харажатлари ижарасиз 1703,8 долларни ташкил қилади (Numbeo таҳлили асосида).
- Бир кишининг ойлик харажатлари ижарасиз 476,4 доллардан иборат.
- Тошкент Нью-Йоркдан 71,4 фоизга арзон (ижара харажатисиз).
- Тошкентда ижара ҳақи Нью-Йоркникидан ўртача 85,4 фоизга паст.
Изоҳ (0)