Статистика қўмитаси 2024 йилдаги Ўзбекистон аҳолисининг ижтимоий муҳофазаси бўйича маълумотларни эълон қилди.
Қўмита ўтган йили Ўзбекистонда пенсия олувчилар умумий сони 4 миллион 246 минг кишига етганини қайд этган. Йил давомида пенсионерлар сони 2023 йилдагидан 93,9 минг кишига (2,3 фоиз) кўпайган.
Пенсия олувчиларнинг энг кўп қисми Фарғона (496,9 минг киши), Самарқанд (449,9 минг киши) вилоятлари ва Тошкент шаҳри (395,6 минг киши) ҳиссасига тўғри келган. Энг кам сон эса Сирдарё (108,9 минг киши), Жиззах (143,6 минг киши) ва Навоий (145,1 минг киши) вилоятларида қайд этилган.
Қўмита пенсия ва нафақа олувчиларнинг ҳар 10 000 аҳолига нисбатан улушини ҳам ҳисоблаб чиққан. Бунда пенсионерлар улуши ўртача 1 131 киши, нафақахўрлар 186 кишини ташкил этган.
Пенсия олувчиларнинг ҳар 10 000 аҳолига нисбатан энг кўп қисми Навоий (1 326 киши), Бухоро (1 299 киши) ва Тошкент (1 271 киши) вилоятларида яшайди. Бошқа ҳудудларга қараганда кам кўрсаткичлар Жиззах (934 киши), Сурхондарё (963 киши) ва Қашқадарё (1 041 киши) вилоятларида аниқланган.
2024 йилда республикада нафақа олувчилар умумий сони 698,6 минг кишига етган. Мазкур кўрсаткич 2023 йилдагига нисбатан 24,2 минг кишига (3,6 фоиз) юқори.
Нафақа олувчиларнинг энг кўп қисми Самарқанд (83,0 минг киши) ва Қашқадарё (81,6 минг киши) вилоятларида, энг кам қисми эса Сирдарё (21,4 минг киши), Навоий (24,0 минг киши) ва Бухоро (28,6 минг киши) вилоятларида қайд этилган.
Лекин қўмита умумий нафақа олувчилар дея ёзган бўлса-да болалар нафақаси олувчи оилалар сонини келтирмаган кўринади. Чунки Ижтимоий ҳимоя агентлиги 2024 йилда 1 миллион 269 мингта кам таъминланган оилаларга болалар нафақаси ва моддий ёрдам тўланганини маълум қилган. Бундан ташқари, иш стажига эга бўлмаган ва меҳнатга лаёқатсиз 696,8 минг кишига нафақа берилгани очиқланган. Шундан 307,7 минг шахс ногиронлик нафақаси, 167,1 минг киши болаларга ногиронлик нафақаси олган.
Статқўмга кўра, ўтган йили мамлакатда ногиронлиги бўлган шахслар сони 1 миллион 20 минг кишини ташкил этган. Бу рақам 2020 йилдагига нисбатан 262,5 мингтага кўп.
Ногиронлиги бўлган шахслар сони қуйидаги гуруҳлар асосида тақсимланган:
- 18 ёшгача ногиронлиги бўлган болалар — 173,3 минг нафар
- I гуруҳ — 94,2 минг нафар
- II гуруҳ — 688,1 минг нафар
- III гуруҳ ногиронлиги бўлган шахслар сони — 65,2 минг нафар.
Маълумот учун, 2025 йил 1 июлдан республикада пенсия ва нафақалар миқдорлари 10 фоизга оширилди. Янги миқдорлар қуйидагича бўлади:
- ёшга доир энг кам пенсия миқдори — ойига 918 000 сўм;
- ногиронлик пенсияларининг энг кам миқдори — ойига 1 012 000 сўм;
- кам таъминланган оилаларга болалар нафақасининг ҳар ойлик миқдори:
- 3 ёшгача бўлган битта кичик фарзанди учун — 360 000 сўм,
- 3 ёшдан 18 ёшгача бўлган битта фарзанди учун — 275 000 сўм;
- оиланинг иккинчи фарзанди учун қўшимча — 165 000 сўм;
- оиланинг учинчи ва ундан кейинги ҳар бир фарзанди учун қўшимча — 110 000 сўм;
- кам таъминланган оилалар учун моддий ёрдамнинг ойлик миқдори — 420 000 сўм.
Изоҳ (0)