“Давлат бюджетидан субсидия ва инвестицияларга харажат қилмаслик керак” — Абдулла Абдуқодиров

Стратегик ислоҳотлар агентлиги директори ўринбосари Абдулла Абдуқодиров фикрича, бюджетдан биринчи навбатда субсидия ва сармоялар учун чиқимларни камайтириш муҳим.

Жорий йил 10-12 июнь кунлари ўтказилган Тошкент халқаро инвестиция форуми доирасида Абдулла Абдуқодиров “Дарё”га интервью берди. Иқтисодчи бир неча масалалар қатори фискал сиёсатда эътибор қаратиш муҳим бўлган жиҳатларга тўхталди.

“Фискал соҳадаги сиёсат жуда динамик. Бугунги кунда камбағалликка қарши курашиш, иқтисодиётга янги туртки бериш масалалари мавжуд. Булар давлат томонидан жуда ҳам катта инвестицияларни жалб қилади. Энг муҳими — биз энергетикага қарам бўлиб қолганмиз. Ҳозирда энергетика соҳасидаги суверенлик йўқлиги факт. Шунинг учун энергия ресурсларини импорт қилишга мажбурмиз ва бу соҳага давлат бюджетидан кетаётган субсидиялар миқдори жуда ҳам юқори. Иқтисодчи сифатида ўйлайманки, биз бюджет харажатларини қисқартиришда биринчи навбатда субсидиялар ва инвестицияларга эътибор қаратишимиз керак. Ижтимоий харажатларга эмас. Субсидия билан инвестиция харажатлари бюджетдан кетмаслиги керак. Буни биз имкони борича қисқартиришимиз зарур”, деди олим.

Абдулла Абдуқодиров сўз давомида 2025 йил I чорагида илк бор 2024 йил мос давридагига нисбатан бюджет харажатлари камайганига эътибор қаратди.

“Тўғри, бунинг асосида ижтимоий харажатларни 28 фоизга қисқартириш бўлди. Лекин барибир умумий бюджет харажатларининг камайиши бу жуда ҳам муҳим нарса”, деди иқтисодчи.

Жорий йил январь–март ойларида давлат бюджетидан нафақа ва иш ҳақига тўловлар камайиб, давлат қарзи фоизлари ва бошқарув чиқимлари кўпайтирилгани хабар қилинганди. Жумладан, давлат бошқарувига харажатлар ўтган йил мос давридагидан 700 млрд сўмга кўпайтирилиб, жами 4,5 трлн сўм ажратилган.

Давлат қарзининг фоиз тўловларига харажатлар бир йил аввалгига қараганда 800 млрд сўмга ортган ва 3,3 трлн сўм йўналтирилган.

Уч ой давомида нафақалар, моддий ёрдам ва компенсация тўловларига харажатлар қарийб 1 трлн сўмга қисқартирилган. Яъни 3,3 трлн сўм ажратилган (2024 йил мос даврида 4,3 трлн сўм).

Дастлабки ҳисоб-китобларга кўра, I чоракда бюджетдан 8 трлн сўмлик субсидиялар ажратилган. Шундан 5,4 трлн сўми энергетикага йўналтирилган. Хусусан, табиий газ сотувидан кўрилган зарарни қоплашга 4,4 трлн сўм субсидия берилган.