Павел Дуров фойдаланувчиларни Android фойдасига iOS’дан воз кечишга чақирди

Apple компанияси фойдаланувчилар эркинлигини чеклаб қўйиши мумкин ва шунинг учун ҳам хавфли ҳисобланади. Бу ҳақда Telegram асосчиси Павел Дуров маълум қилди, деб хабар беради «Коммерсантъ». Унинг сўзларига кўра, фойдаланувчилар эркин маълумотлар оқимидан фойдаланишни истаса, iOS’дан Android’га ўтиши керак.

«Apple ва Google эркинлик борасида Twitter’дан кўра кўпроқ муаммо туғдиради… Apple булар орасида энг хавфлиси ҳисобланади, чунки у мобил дастурлардан фойдаланиш имкониятингизни тўлиқ чеклаб қўйиши мумкин», — деб ёзади Дуров ўз блогига.

Telegram асосчисининг сўзларига кўра, Apple’дан фарқли ўлароқ Android’ларга apk-файллар орқали шахсий мобил дастурларни ўрнатиш мумкин. «Мана шунинг учун ҳам фойдаланувчиларни iOS’дан Android’га ўтишга чақираман — бу улар эркин маълумотлар оқимидан фойдаланиш имкониятини сақлаб қолиши учун қила олиши мумкин бўлган энг кам нарса», — дея қўшимча қилади у.

Аввалроқ Apple компанияси ўзининг мобил дастурлар дўкони — App Store’дан Parper ижтимоий тармоғи иловасини ўчириб ташлади. Таъкидланишича, ундан АҚШ президенти Дональд Трамп тарафдорлари кенг фойдаланган.

Эслатиб ўтамиз, Павел Дуров 2020 йилнинг июнида ҳам App Store ва Google Play’дан мобил иловаларни ўрнатишдан воз кечишга чақирган эди.