Янгиобод бозори — Тошкент шаҳридаги энг машҳур бозорларидан бири бўлиб, у ўзининг кенг савдо майдони, хилма-хил маҳсулотлари ва ўзига хос муҳитга эга. Бозор Тошкентнинг шимолий қисмида жойлашган бўлиб, аҳолининг турли эҳтиёжларини қондирувчи савдо маскани ҳисобланади.
Бу ерда деҳқончилик ва қишлоқ хўжалиги маҳсулотлари, мева ва сабзавотлар, миллий таомлар, кийим-кечак, уй-рўзғор буюмлари каби кенг турдаги маҳсулотларни топиш мумкин. Айниқса, Янгиобод бозори ўзининг арзон нархлари ва хилма-хил танлови билан харидорларни ўзига жалб қилади. Бозор нафақат савдо учун, балки одамлар ўртасида мулоқот, учрашувлар ва кунлик ҳаётнинг ажралмас қисми сифатида ҳам машҳур. Бу ерда бозор муҳитини ҳис этиш, халқнинг кундалик турмуш тарзи ва анъаналарини кўриш мумкин.
Янгиобод бозори айниқса, дам олиш кунлари гавжум. Турли савдогар ва харидорлар бозорни жонли ва ранг-баранг қилади. Бозорнинг муҳим афзалликларидан бири – у ерга жамоат транспорти орқали осонгина етиб бориш мумкин. Ўзбекистоннинг миллий руҳини ҳис қилишни истаган ҳар бир инсон Янгиобод бозорига ташриф буюриши тавсия этилади. Бу нафақат харид қилиш, балки маданият билан танишишнинг ҳам ўзига хос тажрибаси.
Биз “Дарё”нинг “Дарё нигоҳида” рукнида бугун бозорда 15 йилдан буён антиквар буюмлар савдоси билан шуғулланиб келаётган Абдурашид Мадбабаев ҳақидаги фотожамланмани тақдим этамиз.
“Янгиобод бозорида 15 йилдан буён савдо билан шуғулланаман. Собиқ иттифоқ вақтида барча ҳудудларда тўгараклар бўлар эди. Бу тўгараклар турли ёшдаги болалар ва ўсмирларни қамраб олиб, уларнинг бўш вақтини фойдали ўтказишларига кўмаклашар эди. Мусиқа, рақс, театр, адабиёт, радиоэлектроника, авиамодел ясаш, конструкторлик, математика ва физика, футбол, волейбол, гимнастика, сузиш, шахмат каби спорт турлари ва ҳоказо.
Мен эса уларнинг орасида фотографияга қизиққанман. Айниқса, “Зенит ТТЛ” камераси катта қизиқиш уйғотган. Ўша даврнинг энг машҳур фильмли фотокамераларидан бири. Бу модел ХХ асрнинг ўрталарида фото ихлосмандлари орасида жуда оммалашган эди, нафақат СССР, балки хорижда ҳам кенг қўлланилган. Нархи муҳандисларнинг ойлигига деярли тенг, адашмасам, 120 рублга баҳоланган”.
“Харидорларим орасида фотоаппаратларимга қизиқиб келадиганларни 2 тоифага бўлиш мумкин. Айримлари уларни суратга олиш, бошқалар эса декор буюми сифатида харид қилишади. Менга, албатта, фотографлар билан мулоқот қилиш қизиқроқ. Камераларимни 200-300 минг сўмга баҳолайман, шунинг учун ҳар ким уларни бемалол сотиб олиши мумкин. Уларнинг ҳар бирини йиллар мобайнида йиғганман. Эски даврларда ҳар бир аҳоли пунктида фотоательелар бўлган. Одамлар ҳужжатларга айнан уларга бориб суратга тушар эди. Шунинг учун аҳолида ҳозир ҳам сандиқларда эски камералар сақланади.
Мен қишлоқма-қишлоқ, ҳудудлар бўйлаб юриб эски буюмларни харид қиламан. Баъзан эса антиквар буюмлар сотиладиган маҳаллий бозорлардан ҳам оламан. Сурхондарё, Қашқадарё, водий вилоятларидаги хонадонлардан кўп буюмлар харид қилганман. Хуллас бу борада ҳамма жойда алоқаларим бор”.
“Фотография билан мунтазам шуғулланган вақтларим энг ёқтирган жанрларимдан бири бу пейзаж эди. Табиат, тоғлар ва куз ҳамда баҳор манзараларини кадрга муҳрлашни ёқтирар эдим. Тонг маҳали ва кунботар вақтларида, айниқса, фотоаппарат билан сайрга чиқиш мароқли эди”.
“Янгиобод бозори ҳақида гапирсам, бу ерга одамлар, асосан, болалиги, хотираларини эслаш учун келишади. Ўша дамларга бир зумгина қайтиш, лаҳзаларни жонлантириш учун. “Буни эслайсанми? Буни-чи?” каби саволлар билан илиқ табассумни кўраман юзларида.
Айрим ота-оналар атайлаб фарзандларини олиб келишади. Болалар катталар яшаб ўтган умрнинг бир қисмини кўришларини хоҳлашади. Баъзан кулгили ҳолатлар ҳам кузатилади. Масалан, бир гал болакай эски телефон аппаратини ишлатишни билмасдан қаерини босиш кераклигини сўраганди. Қисқа қилиб айтсам, Янгиобод аҳоли ва сайёҳлар учун бепул музей вазифасини ўтаб келяпти. Агар шароит ва имкониятим бўлса, ўзим алоҳида музей ташкил этган бўлар эдим”.
“Бўш вақтларимда китоб ўқишни ёқтирар эдим. Ҳозир ҳам шундай. Психология йўналишидаги адабиётлар, айниқса, мени ўзига жалб қилади. Теология бўйича китоблар ҳам катта қизиқиш уйғотган. Мактаб вақтларим ҳам таътилда янги ўқув йилида ўтиладиган мавзуларни ўқиб чиқар эдим”.
Изоҳ (0)