Тошкентдаги “Фотосуратлар уйи”да Ўрта Осиёнинг машҳур фотографларидан бири Виктор Орден томонидан олинган ва Санкт-Петербургдаги Кунсткамера музейида сақланаётган ХIX асрнинг Ўзбекистонга оид фотосуратлари илк бор намойиш этилади. Ушбу кўргазма Туркистон ҳудудининг 114 ноёб суратларидан иборат.
Орден томонидан олинган Ўзбекистонга оид ноёб фотосуратлар тўплами ўз даврининг бой тарихини, маданиятини ва ҳаёт тарзини акс эттиради. Ушбу коллекция нафақат санъат аҳли учун, балки тарих ихлосмандлари ва маҳаллий маданиятни қадрловчилар учун ҳам бебаҳо ҳисобланади. Орденнинг суратлари орқали Ўзбекистоннинг ранг-баранг манзаралари, қадимий шаҳарларнинг кўчаларида акс этган оддий одамлар ҳаёти ва миллий меъморчилик обидалари ҳаққоний тарзда ёритилган.
Фотосуратларда шаҳарлар, қишлоқлар, анъанавий либослар ва турли касб эгалари кўринишлари билан танишиш мумкин. Ушбу тўплам орқали томошабин Ўзбекистоннинг тарихий босқичлари, миллий қадриятлари ва ўзига хос меъморий гўзаллигини ҳис қилиши мумкин. В.Орденнинг нозик қарашлари ва ўзига хос ёндашуви туфайли бу суратлар ҳар бир детали билан ўзига жалб қилади, у орқали мамлакат маданиятининг чинакам руҳини ҳис қилиш мумкин.
Кўргазма билан бирга, ташриф буюрувчилар Юлдуз техника университети томонидан чоп этилган ва уч тилда тайёрланган “ХIX асрда Ўзбекистон” китобини ҳам кўздан кечиришлари мумкин.
4 ноябрь куни ушбу кўргазмаларнинг очилиш маросими ташкил этилди. “Дарё” фотомухбири унинг эътиборга молик лаҳзаларини кадрларга муҳрлади.
Изоҳ (0)