Қашқадарё вилоятининг Муборак туманида жойлашган манзил-колонияда ток урган маҳкум вафот этган. Бу ҳақда “Дарё” манбаси хабар берди.
Манбага кўра, маҳкум кеча 19 ноябрь куни ҳаётдан кўз юмган.
“Марҳум қилган жинояти учун Муборак туманидаги 33-сонли манзил-колонияда жазо муддатини ўтаётганди. Бир оз аввалроқ уни ток урган. Шундан сўнг шифохонага олиб боришган. У ерда маҳкумда ОИTС ҳам борлиги маълум бўлган. Маҳкум 19 ноябрь куни вафот этди, дейди манба.
“Дарё” ахборотга аниқлик киритиш мақсадида Ички ишлар вазирлиги ахборот хизмати ёрдамида Жазони ижро этиш муассасалари ахборот хизматининг Шаҳризод исмли масъули билан боғланди. Ҳолат ҳақида билдириб, аниқлик киритиш масаласида кўмак сўради.
Масъул ҳозирча воқеадан хабари йўқлигини, бироқ суриштириб тез орада аниқлик киритиб, таҳририятга маълумот беришини айтди. Аммо ваъда бажарилмади.
Изоҳ (0)