Самарқанддаги боғча ва мактабларда бўғма илон томошалари ўтказилгани аниқланди. Бу ҳақда болалар омбудсмани хабар берди.
Ижтимоий тармоқларда боғча тарбияланувчилари кўз ўнгида бўғма илон билан “Илон ўйини” томошаси видеотасвири тарқалганди. Мазкур ҳолат алоҳида назоратга олиниб, болалар омбудсманининг таълим муассасаларида тарбияланувчилар ва ўқувчилар хавфсизлигига зид равишда ёввойи жонзот воситасида ўтказилган бундай цирк томошаси ҳолатига ҳуқуқий баҳо бериш тўғрисидаги сўрови асосида ҳолат ИИВ томонидан ўрганилди.
Аниқланишича, 24 октябрь куни Қўшработ туманида жойлашган мактабгача таълим муассасасида Иштихон туманида яшовчи Б.М. ва И.Б. МТМ 60 нафарга яқин тарбияланувчиларининг кўз ўнгида бўғма илон билан цирк томошасини намойиш қилган.
Б.М. фаолият юритувчи МЧЖ томонидан Қўшработ туман ҳудудида 31 декабрга қадар замонавий цирк томошаларини ўтказиш учун рухсатномаси бўлса-да, унинг доирасида “илон ўйини” кўзда тутилмаган.
Текшириш давомида М.Б. ва Б.И. томонидан моддий манфаатдорлик эвазига Қўшработ туманида жойлашган яна 8 та умумтаълим мактабларда ҳам мазкур бўғма илон билан цирк томошаси ўтказилгани аниқланган (жами 840 нафар ўқувчи томошабин бўлиб иштирок этган).
Самарқанд вилояти Экология бошқармасининг маълум қилишича, томошаларда фойдаланилган мазкур йўлбарс питони Халқаро Қизил китобга киритилган. Узунлиги 2,78 метр эни 28 сантиметр бўлган ушбу жонзот Ўзбекистонга ноқонуний йўл билан олиб кирилган.
26 ноябрь куни Б.М. томонидан ноқонуний равишда сақланган йўлбарс питони мутахассислар иштирокида ҳужжатлаштирилиб, вилоят Экология бошқармасига тегишли тартибда топширилган.
Айни пайтда мазкур ҳолат юзасидан терговга қадар текширув ҳаракатлари давом эттирилиб, вазиятга ҳуқуқий баҳо бериш юзасидан қонуний чоралар кўрилмоқда.
Изоҳ (0)