Жанубий Кореянинг вақтинчалик президенти Чой Санг Мок Муан жануби-ғарбий туманини ҳалокатли самолёт авариясидан сўнг давлат ёрдами олиш ҳуқуқига эга бўлган махсус офат ҳудуди сифатида белгилади.
Чой бу ҳақда Сеулдан 288 километр жануби-ғарбда жойлашган Муан халқаро аэропортига келганидан сўнг маълум қилди.
“Ҳукумат барча мавжуд ресурсларни Марказий офатлар ва фавқулодда ҳолатлар штаби орқали сафарбар қилмоқда ва Муан ҳудудини махсус офат зонаси деб эълон қилади.
Ҳалокат сабабларини тўлиқ ўрганамиз ва келажакда шундай воқеаларнинг олдини олиш учун чоралар ишлаб чиқамиз”, деди Чой Муан шаҳрида ўтказилган ҳукумат йиғилишида.
Вақтинчалик президент тегишли идораларга барча мавжуд ускуналар, кадрлар ва инфратузилмалардан фойдаланишни буюриб, “яна бир кишини бўлса ҳам қутқариш” учун саъй-ҳаракатлар қилишни талаб қилди.
“Менимча, бу даҳшатли фожиа туфайли зарар кўрган оилалар учун ҳеч қандай сўз тасалли бўла олмайди.
Ҳукумат фожиа қурбонларининг яқинларига ёрдам кўрсатишда барча имкониятларини ишга солади”, дея қўшимча қилди вақтинчалик президент.
Шунингдек, Чой қутқарув операцияси давомида ёнғин хавфсизлиги ходимларининг хавфсизлигини таъминлаш учун қўшимча эҳтиёт чораларини кўриш зарурлигини таъкидлади.
Ёнғин хавфсизлиги хизмати ходимлари қутқарилган икки кишидан ташқари, ҳалокатга учраган самолёт бортидаги барча одамлар ҳалок бўлган деб тахмин қилинмоқда.
Маълумот учун, ҳалокатга учраган самолётда 181 киши бўлган: 175 йўловчи ва 6 нафар борт ходими.
Эслатиб ўтамиз, Чой Санг Мок жума кунидан буён вақтинчалик президент сифатида хизмат қилмоқда.
Изоҳ (0)