Машҳур кийим-кечак бренди хитойлик ишчиларни эксплуатация қилишда айбланди

Италиянинг LVMH гуруҳига кирувчи Loro Piana бренди мажбурий меҳнат билан боғлиқ жиддий айбловларга дуч келди. Бу ҳақда Reuters хабар берди.

Лукс тоифадаги ушбу бренд ўз ишлаб чиқариш фаолиятини билвосита Хитой компанияларига субпудрат асосида топширгани гумон қилинмоқда. Ишчиларнинг асосий қисмини Хитойдан келган мигрантлар ташкил этган. Улар ҳафтасига 90 соатгача ишлашга мажбур бўлиб, яшаш жойи сифатида ҳам шу цехлардан фойдаланилган. Айрим ҳолатларда уларга атиги 4 евро атрофида соатбай ҳақ тўлангани аниқланган. Ишчиларнинг ярми ноқонуний равишда ишлаган.

Шу сабабли Миландаги суд Loro Piana устидан бир йил муддатга ташқи бошқарув жорий этишга қарор қилган. Агар компания ўз фаолиятини қонунчилик талабларига мослаштирса, бу чоралар белгиланган муддатдан олдин бекор қилиниши мумкин. Бренд ҳозирча ушбу масала юзасидан изоҳ бермаган. Бироқ компания ички аудит тизимини такомиллаштиришга ва ҳуқуқни муҳофаза қилиш органлари билан ҳамкорлик қилишга тайёр эканини билдирган.

Журналистлар таъкидлашича, Loro Piana шу тарзда Миландаги суд томонидан меҳнат эксплуатацияси сабабли суд назоратига олинган бешинчи мода саноати бренди бўлди. Аввалроқ Valentino, Аlviero Martini, Dior ва Armani ҳам шунга ўхшаш айбловларга дуч келган эди.

Хусусан, 2024 йилнинг июль ойида Dior ва Аrmani ишлаб чиқариш цехларида ҳам ноқонуний мигрантлар ёллангани аниқланган, уларга соатига атиги 2 доллар тўланган. Ишчиларнинг аксарияти Хитой фуқаролари бўлиб, деярли тун-у кун, дам олиш ва байрам кунлари ҳам ишлаган. Улар ишлаб чиқариш цехларида яшашга ҳам мажбур бўлган. Dior ва Armani вакиллари эса бу айбловларни инкор этган.