Сурхондарёнинг Денов туманидаги боғчада тарбиячининг болага қўпол муносабатда бўлгани акс этган видео ижтимоий тармоқларда тарқалганди. Вилоят Мактабгача ва мактаб таълими бошқармаси тарбиячи ишдан олинганини маълум қилди.
Болалар омбудсмани берган хабарга кўра, видеодаги ҳолат 13 август куни Денов туманидаги 16-сонли давлат мактабгача таълим ташкилотида содир бўлган. Тарбиячи А.Г. машғулот давомида 5 ёшли бола М.I. беодоблик қилгани учун гўёки уни тарбиялаш мақсадида қўлидаги чизғич билан урган.
Ходим ўз меҳнат мажбуриятларини қўпол равишда бузгани учун Меҳнат кодексининг 161-моддаси иккинчи қисми 5-бандига асосан тарбиячи А.Г. билан тузилган меҳнат шартномаси бекор қилинган.
Шунингдек, таълим муассасасида маънавий носоғлом муҳит юзага келгани, ўз ишида масъулиятсизликка йўл қўйгани сабабли ушбу мактабгача таълим ташкилоти директори билан тузилган меҳнат шартномаси ходимнинг ўз аризасига мувофиқ бекор қилинган.
Воқеа юзасидан ҳуқуқ-тартибот идоралари томонидан ҳам ўрганиш ишлари олиб борилаётган бўлиб, ҳолатга ҳуқуқий баҳо берилади.
Изоҳ (0)