Ханти-Мансийск автоном округи думаси Россия Федерацияси коммунистик партияси фракцияси аъзоси Холид Таги-Задени маошидан маҳрум этди. У минтақани ўзбекларнинг “тарихий ватани” деб таъкидлаган эди.
Маълум қилинишича, Югра думасининг 3 июль кунги мажлисида “Депутатлик фаолиятини доимий профессионал асосда амалга оширишни тўхтатиш тўғрисида”ги қарор лойиҳаси кўриб чиқилган. Думанинг ижтимоий ривожланиш қўмитаси раиси Василий Филиппенконинг тушунтиришича, Таги-Задени округ парламенти ва қўмита мажлисларини ўтказиб юборгани, шунингдек, амалда депутатлик вазифаларини бажармаётгани сабабли маошидан маҳрум этиш мўлжалланмоқда.
“Ҳеч кимни ҳақорат қилиш ниятим йўқ эди... Мен шунчаки ҳамма ҳам бюджетга ёпишиб олиш учун келмаслигини айтмоқчи эдим. Менинг фикримча, одамлар эҳтимол яхши ният билан келишаётгандир, умумий маданият, умумий тарих мавжудлиги, улар Россиянинг бир қисми бўлишни исташлари, ўзларини мамлакатимизга яқин ҳис қилишлари мумкин. Баъзи одамлар, ҳаммаси эмас. Мен бу юртни севаман, бу ерда 40 йилдан бери яшаяпман. Мен халқимизни, бу ерда истиқомат қилувчи барча халқларни ҳурмат қиламан”, деди Таги-Заде овоз беришдан олдинги нутқида.
Дума раиси Борис Хохряков ўз навбатида, қарор бевосита ўша шов-шувли ибора билан боғлиқ эмаслигини таъкидлаган.
Овоз бериш натижасига кўра, Холид Таги-Задени депутатлик маошидан маҳрум қилиш юзасидан 32 депутат розилик билдирган, биттаси қарши чиққан, яна беш нафари овоз беришда иштирок этмаган.
Округ парламенти матбуот хизматининг маълум қилишича, доимий профессионал асосда депутатлик фаолиятини амалга оширишнинг тўхтатилиши Таги-Задени фақат маошидан маҳрум қилади, лекин мандатидан эмас. У ижтимоий ривожланиш қўмитаси таркибида ишлашни давом эттиради.
30 май куни ижтимоий тармоқларда Россия Федерацияси коммунистик партиясидан сайланган Ханти-Манси автоном округи думаси депутати парламент йиғилишида округни “ўзбекларнинг тарихий ватани” сифатида кўриш мумкинлигини билдиргани ҳақида видеолар тарқалди.
Маълум қилинишича, Ханти-Манси автоном округи думаси мажлисида парламент аъзолари ўртасида маҳаллий халқларнинг туғилиши ва ўлими ҳақида мунозара юз берган. Россия Федерацияси коммунистик партиясидан сайланган депутат Холид Таги-Заде ўзбекистонлик муҳожирлар ХММОга “ўзларининг тарихий ватанига” қайтаётганини айтиб, ҳамкасбларига Сибир хонлиги тарихини эслатган.
“Мигрантлар ҳам турли хил бўлади. Масалан, ўзбекларга келсак: Югра ва Тюмен вилоятининг бир қисми тарихан Сибир хонлиги эди. Маълумки, Кўчимхон сўнгги ҳукмдор бўлган. У эса шайбонийлар сулоласига мансуб. Мана шу шайбонийлар сулоласи — Бухоро хонлигидан чиққан ҳукмрон ўзбек сулоласи ҳисобланади. Эҳтимол, муҳожирлар бу ерга ўзларининг тарихий ватанига келаётгандек келишаётгандир?”, деди депутат мажлис давомида.
Дума раиси бунга жавобан Таги-Заденинг яна бир муҳимроқ масалага қайтишини сўраган.
Изоҳ (0)