Англиянинг “Манчестер Сити” клуби “ПСЖ” дарвозабон Жанлуижи Доннарумма билан шартномани имзолашни истамоқда. Италиялик журналист Жанлука Ди Марсионинг хабар беришича, парижликлар ва футболчи ўртасидаги музокаралар муваффақиятсиз якунланган ва Клублар ўртасидаги Жаҳон чемпионатидан томонлар яна бир шартнома узайтириш учун ҳаракат қилиб кўради. “Сити” раҳбарияти эса “ПСЖ” ва футболчи ўртасидаги келишмовчиликдан фойдаланиб қолиб, унга яхшиланган шартнома таклиф қилмоқчи.
Манбага кўра, Клуб устози Хосеп Гвардиола италиялик киперни ўз жамоасида кўришни истамоқда. Сабаби, жорий мавсум “шаҳарликлар” дарвоза чизиғида кўплаб муаммолар пайдо бўлди. Доннарумма эса ушбу камчиликни ёпиши мумкинлиги айтилмоқда.
“ПСЖ” раҳбарияти Чемпионлар Лигасидаги ғалабада муҳим ҳисса қўшганига қарамай, 26 ёшли дарвозабоннинг ойлик маошини оширишни истамаяпти. Шу билан бирга, мавжуд шартнома шартларини ҳам ёмонлаштирмоқчи эмас. Унинг ҳозирги шартномаси 2026 йил ёзида якунланади. Маълум бўлишича, Доннарумманинг “ПСЖ”даги йиллик маоши 12,7 миллион евро этиб белгиланган.
Маълумот учун, Доннарумма ўтган мавсум парижликларнинг барча турнирлар доирасидаги 40 та учрашувда майдонга тушиб, 12 беллашувда ўз дарвозаси даҳлсизлигини сақлаб қолган. Transfermarkt портали посбоннинг қийматини 35 миллион еврога баҳолаган.
Изоҳ (0)