Тошкент вилоятининг Бўстонлиқ туманида зиёратгоҳ жойлашган қишлоқ чиқиндихонага айланаётгани айтилди. Маданий мерос агентлиги ҳолат юзасидан маълумот берди.
Келтирилишича, Тошкент вилоятининг Бўстонлиқ туманида жойлашган Шайх Умар Вали Боғистоний зиёратгоҳи Вазирлар Маҳкамасининг 2019 йил 4 октябрдаги “Моддий маданий мероснинг кўчмас мулк объектлари миллий рўйхатини тасдиқлаш тўғрисида”ги 846-сонли қарори билан муҳофазага олинган.
Зиёратгоҳ жойлашган ҳудудда ҳозирги вақтда ободонлаштириш ишлари амалга оширилмоқда. Ташриф буюрувчилар учун чиқиндилар ташлаш учун махсус қутилар ўрнатилган ҳамда бириктирилган ходимлар томонидан мунтазам равишда назорат олиб борилмоқда.
Вилоят бошқармаси ходимлари томонидан қадимий обида кўздан кечирилганида меҳмонлар учун ошхона, таҳоратхона ва ювиниш хоналари доимий озода сақлаб келинаётгани маълум бўлди.
Маълумот учун, Бўстонлиқ туманининг “Боғистон” маҳалласида жойлашган Шайх Умар Вали Боғистоний ёдгорлиги VII-ХВ асрларга оид зиёратгоҳ ҳисобланади.
Аввалроқ ижтимоий тармоқларда Самарқанд вилоятида жойлашган Хон Саид Имом мажмуаси таъмирталаб ҳолатга келиб қолгани ҳақида хабарлар тарқалганди. Маданий мерос агентлиги Самарқанд вилояти бошқармаси томонидан ҳолат атрофлича ўрганиб чиқилган.
Унга кўра, Маданий мерос агентлигининг 2024 йил 6 майдаги “2024 йилда реставрация ва таъмирлаш-тиклаш ишлари амалга ошириладиган маданий мерос объектлари ва давлат музейларининг манзилли рўйхати” тасдиқланган бўлиб, унда Хон Саид Имом мажмуасини реставрация ва таъмирлаш-тиклаш учун 906,1 миллион сўм маблағ ажратилган.
Изоҳ (0)