Туркман халқининг миллий етакчиси Ўзбекистон президентини туғилган куни билан табриклади.
Президент матбуот хизматининг хабар қилишича, Шавкат Мирзиёев ва Туркманистон Халқ маслаҳати раиси Гурбангули Бердимуҳамедов 24 июль куни телефон орқали мулоқот қилган.
Туркманистон миллий етакчиси давлат раҳбарини таваллуд куни билан табриклаб, мустаҳкам соғлик ва фаровонлик, қардош Ўзбекистон халқига эса тинчлик-осойишталик ва равнақ тилади.
Икки давлат ўртасидаги кўп қиррали, дўстлик, яхши қўшничилик ва стратегик шериклик муносабатларининг долзарб масалалари муҳокама қилинди. Яқинда бўлиб ўтган ҳукуматлараро комиссия ва ишбилармонлар кенгаши йиғилишларининг самарали якунлари қайд этилди.
Товар айирбошлашни янада кўпайтириш, янги кооперация лойиҳаларини илгари суриш ва маданий алмашинувни ривожлантириш муҳимлиги таъкидланди.
Ўзбекистон президенти 67 ёшни қарши олди
Шавкат Мирзиёев 1957 йил 24 июлда Жиззах вилоятининг Зомин туманида шифокор оиласида туғилган. 1981 йили Тошкент ирригация ва қишлоқ хўжалигини механизациялаш муҳандислари институтини тугатган.
У 2003 йилда Ўзбекистон бош вазири этиб тасдиқланиб, 2016 йилга қадар фаолият юритган. 2016 йил 4 декабрь куни бўлиб ўтган президент сайлови якунлари бўйича сайловчиларнинг 88,61 фоиз овози билан Ўзбекистон президенти этиб сайланган. 2021 йил 24 октябрь куни бўлиб ўтган президент сайловида 80,1 фоиз овоз билан 7 йил муддатга Ўзбекистон президенти этиб қайта сайланган. “Меҳнат шуҳрати” ва “Фидокорона хизматлари учун” орденлари билан тақдирланган.
Изоҳ (0)