Тошкент вилояти ҳокими Зоир Мирзаевнинг 15 ноябрдаги фармойиши билан учта машина харид қилиш учун 1 миллиард 336,5 миллион сўм ажратилади. Бу борадаги ҳужжат “E-qaror” электрон тизимига жойлаштирилган.
Фармойишда қайд этилишича, машиналар учун маблағ вилоят маҳаллий бюджетининг 2023 йил 3-чорак якуни билан шаклланган даромадлар режасининг орттириб бажарилган қисми ҳисобидан ажратилади. Транспорт воситалари вилоят ҳокимининг биринчи ўринбосари Абдурасул Абдуллаев, вилоят ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари Отабек Султонбеков ва Юқори Чирчиқ тумани ҳокими Ускенбай Атемов мўлжалланган.
“Газета.уз”нинг вилоят ҳокимлиги матбуот хизматига таяниб ёзишича, машиналар BYD гибрид туркумидаги автомобиллар саналади. Амалдаги хизмат автотранспортларини алмаштиришга эҳтиёж улардан 5 йилдан ортиқ фойдаланилгани сабабли туғилган.
Вазирлар Маҳкамасининг 2021 йил 29 апрелдаги қарорига мувофиқ,
- вилоят ҳокимларининг ўринбосарлари хизмат автотранспортининг энг юқори нархи — БҲМнинг 1500 баравари (495 миллион сўм)дан;
- туман ва шаҳар ҳокимлариники — БҲМнинг 1000 баравари (330 миллион сўм)дан ошмаслиги керак.
Август ойида Тошкент вилояти ҳокимлиги янги қимматбаҳо автомобиль харид қилгани ҳақида хабар тарқалгач, ҳокимлик матбуот хизмати буни рад этиб, “яқин орада янги автомобиль харид қилиш ҳам режалаштирилмаган”ини билдирганди.
Изоҳ (0)