Қозоғистон фуқароси ўз мамлакатида жиноий гуруҳга аъзо бўлиш, гиёҳванд моддалар савдоси ва контрабандада айбланиб Россиядан экстрадиция қилинди. Бу ҳақда Tengrinews хабар берди.
Маълумотларга кўра, гумонланувчи 2003 йилда Ўзбекистон орқали Қозоғистон ва Россияга гиёҳванд моддалар (героин ва опий) олиб ўтувчи жиноий гуруҳ фаолиятида қатнашган. У гиёҳванд моддаларни ташиш, сақлаш ва гуруҳ аъзоларига топшириш ишларини бажариб келган.
2003 йилда Қизилўрда ва Қарағанда вилоятларида ўтказилган махсус операциялар давомида бир қатор жиноятчилар ушланган ва 35 килограм героин ҳамда 28 килограм опий мусодара қилинган. Гуруҳ аъзоларининг баъзилари судланган, лекин гумон қилинувчи полициядан қочиб, халқаро қидирувга берилган. 20 йилдан сўнг, 2024 йил декабрида Россиянинг Самара вилоятида ушланган ва Қозоғистон прокуратураси талабига биноан экстрадиция қилинган. Ҳозирда у ҳибсда сақланмоқда. Унга 10-15 йиллик қамоқ ва мулкни мусодара қилиш жазоси берилиши мумкинлиги айтилмоқда.
Изоҳ (0)