Тошкентнинг Бўрижар каналига тушиб кетган қизларни қутқарган эркакнинг ўзи ҳалок бўлгани ҳақида хабар берилганди.
Яккасарой туманида яшовчи икки нафар қизалоқ каналга тушиб кетган. Буни кўрган Абдуманноп Самиқов ўзини сувга ташлаб, норасидалар ҳаётини сақлаб қолди. Лекин бу эзгулик йўлида фуқаронинг ўзи қаҳрамонларча ҳалок бўлди.
Президент матбуот котиби Шерзод Асадовнинг маълум қилишича, давлат раҳбари бу жасорат тарихини юрагига яқин олиб, аввало, марҳумнинг рафиқаси ва фарзандларига ҳамдардлик билдирди. Бугун президент марҳум Абдуманноп Самиқовни “Жасорат” медали билан мукофотлаш тўғрисидаги фармонни имзолади.
Шунингдек, қизалоқларни қутқаришда жонбозлик кўрсатган “Бўрижар” спорт мажмуаси ишчиси Нурмуҳаммад Мамасалиев ҳам “Жасорат” медали билан тақдирланган.
“Бу мамлакатимизда инсон қадрини улуғлаш, ватан қаҳрамонларига ҳурмат кўрсатиш борасидаги эътиборнинг яна бир ифодаси бўлди. Кучли ва меҳр-оқибатли жамиятда инсонийлик ҳеч қачон унутилмайди”, деб ёзади президент матбуот котиби.
Изоҳ (0)