“Металлург” футбол клуби ходими Даниэль Коршунов чўкаётган фуқарога ёрдам кўрсатиб, унинг умрини сақлаб қолди. Бу ҳақда футбол клуби матбуот хизмати хабар берди.
Маълум қилинишича, Даниэль Коршунов ҳар куни эрталаб ва кечқурун клуб қароргоҳи ёнидан ўтувчи канал бўйлаб сайр қилишга одатланган. 27 июнь куни у ҳамкасби билан сув ёқалаб кетаётганида кимнингдир каналда бир кўриниб, бир кўринмай чўкаётганига кўзи тушган.
Даниэль ўйлаб ўтирмасдан ўзини каналга отган ва чўкаётган болани канал қирғоғи томон тортган. Бу вақт ёрдамга етиб келганлар ҳам Даниэлга кўмаклашган.
Бекободга иш юзасидан Зафар шаҳридан келган отахон фарзандини қутқарган йигитларга миннатдорчилик билдирди, — дейилади хабарда.
Апрель бошларида Тошкентнинг Чилонзор туманидан оқиб ўтувчи Бўрижар каналида 3 киши чўкиб кетгани тўғрисида хабар берилганди. Январь ойи ўрталарида эса Сирдарёда ўқувчилар бўлган Gentra каналга тушиб кетиши оқибатида эгизаклар сувда ҳалок бўлган эди.
Изоҳ (0)