Аҳоли сони кичик бўлган маҳаллаларнинг “Ташаббусли бюджет”да ғолиб бўлиш имкониятини яратиш мақсадида доимий тарзда ғолиб бўлиб келаётган маҳалла (ташкилот)ларга танаффус эълон қилиш амалиёти жорий этилиши мумкин. Бу ҳақда Олий Мажлиси Қонунчилик палатасининг 30 июлдаги мажлисида маълум қилинди.
Мажлисда бош вазир ўринбосари — иқтисодиёт ва молия вазири Жамшиқ Қўчқоровга “Ташаббусли бюджет асосида шакллантирилган лойиҳаларни молиялаштириш ва уларнинг натижадорлигини таъминлаш борасида амалга оширилаётган ишлар тўғрисида” юборилган парламент сўрови жавоби кўриб чиқилди.
Унга кўра, кенг жамоатчилик ва депутатларнинг таклифларини инобатга олиб амалдаги тартибга яна қуйидаги ўзгартириш ва қўшимчалар киритилиши назарда тутилмоқда:
- ходимларни мажбурий овоз тўплашга жалб этиш ҳолатларини бартараф этиш мақсадида овоз бериш босқичи муддатини 10 кунга камайтириш, мажбурий овоз тўпланган лойиҳаларни ғолиб лойиҳалар рўйхатидан четлатиш амалиётини жорий этиш;
- халқ депутатлари ҳудудий кенгашларининг ваколатларини кенгайтириш мақсадида туман (шаҳар) бюджетидан қўшимча маблағ ажратиш ҳисобига ғолиб бўлмаган лойиҳаларни қўшимча ғолиб сифатида эълон қилиш амалиётини жорий этиш.
Ушбу ҳужжат лойиҳаси ишлаб чиқилиб, кўриб чиқиш ва тасдиқлаш учун Олий Мажлис Сенатига тақдим этилган.
Мажлисда қайд этилишича, “Ташаббусли бюджет” лойиҳаларини шакллантириш, лойиҳани танлаш, танлов ғолибларини аниқлашда инсон омилини имкон қадар қисқартириш бўйича тизимли ишлар қилинмоқда. Жумладан, жиҳозлаш лойиҳаларини шакллантиришни тартибга солиш мақсадида жорий йилдан бошлаб жиҳозлаш билан боғлиқ барча лойиҳалар электрон реестр асосида тегишли вазирликлар томонидан тақдим этилган ва рухсат этилган товар ва жиҳозлар асосида шакллантириш тизими жорий этилди.
Ички йўллар бўйича лойиҳаларни шакллантиришда йўлнинг узунлигидан келиб чиқиб, лойиҳа қиймати портал томонидан автоматик тарзда ҳисоблаб чиқилиши жорий этилди. Ишчи комиссия томонидан лойиҳаларни саралаб олиш тўлиқ автоматлаштирилиб, саралаш босқичи шаффоф тарзда амалга оширилиши таъминланди.
Шу билан бирга, “Фуқаролар ташаббуси жамғармаси” маблағлари ҳисобидан 2023 йил ва 2024 йилнинг ўтган даврида ажратилган маблағларнинг мақсадли ишлатилиши бўйича ўтказилган ўрганишларда аниқланган камчиликлар ва уларни бартараф этиш бўйича тизимли ишлар олиб борилмоқда.
Изоҳ (0)