Ўзбекистондаги мактабларда 5,7 миллион нафар ўқувчи, боғчаларда 1,3 миллион нафар тарбияланувчи тиббий текширувдан ўтказилди. Бу ҳақда 30 июль куни соғлиқни сақлаш вазири вазифасини бажарувчи Асилбек Худаяров Олий Мажлис Қонунчилик палатаси йиғилишида маълум қилди.
Асилбек Худаяровнинг айтишича, тиббий кўриклар давомида мактаб ва боғча болаларининг 30 фоизга яқинида бир неча турдаги касалликлар аниқланган.
“Жорий йил 1 июль ҳолатига республикадаги 5,9 миллион нафар мактаб ўқувчиларидан 5,7 миллион нафари (96,5 фоизи) тиббий кўрикдан ўтказилди. Шундан 1,3 миллион нафар болаларда (27,9 фоизида) турли касалликлар аниқланди. Уларнинг 81 фоизини соғомлаштиришга эришилди. Шу билан бирга, 2 миллион нафар боғча тарбияланувчиларидан 1,3 миллион нафари (63,5 фоизи) тиббий кўрикдан ўтказилди. Уларнинг 26 фоизида турли касаликлар аниқланди”, деди вазир.
Асилбек Худаяров ўз чиқишида тиббий кўрик давомида болаларда энг кўп аниқланган касалликлар ҳақида гапирди.
“Мактабгача таълим муассасалари ва мактаблардаги 28,4 фоиз болаларда биринчи ўринда қон ва қон яратиш аъзоларида касалликлар учрамоқда. Масалан, анемия ва бошқалар. Кейинги ўринларда нафас олиш аъзолари, овқат ҳазм қилиш, эндокрин касалликлари аниқланди”, деди вазирлик расмийси.
Вазирнинг маълум қилишича, ҳозир Ўзбекистонда 18 ёшгача бўлган болалар ва ўсмирлар сони 12,9 миллион нафардан ортиқ (умумий аҳолининг 35 фоизи). Мамлакатдаги 10 165 та мактабларнинг 58,6 фоизи педиатр билан таъминланган. Мазкур педиатрларнинг 14 фоизи мактабларда доимий ишлайди, қолган 85 фоизи ўриндош вазифасида фаолият юритади.
Изоҳ (0)