АҚШ президенти Дональд Трамп Россия раҳбари Владимир Путинни 2026 йилги футбол жаҳон чемпионатига, жумладан Қўшма Штатларда ўтказиладиган финал босқичига таклиф этиши мумкинлигини билдирди. Америкалик сиёсатчи бу баёнотни Халқаро футбол федерацияси (FIFA) раҳбари Жанни Инфантино билан учрашувда маълум қилди. Учрашув YouTube’да жонли эфирда намойиш этилди.
Оқ уй раҳбари журналистларга Аляскада яқинда бўлиб ўтган саммитда россиялик ҳамкасби билан тушган расмини кўрсатган ва Путин жаҳон чемпионатига келишини айтган.
“У воқеаларнинг ривожига қараб келиши ёки келмаслиги мумкин”, деди Трамп ва “кейинги бир-икки ҳафта ичида кўплаб воқеалар содир бўлиши кутилаётганини” қўшимча қилган.
2026 йилги жаҳон чемпионати уч давлат — АҚШ, Канада ва Мексика ҳудудида ўтказилади. Мусобақада 48 та миллий терма жамоа 4 тадан жамоадан иборат 12 та гуруҳга бўлинган ҳолда иштирок этади. Жаҳон чемпионатининг плей-офф босқичига дастлабки икки ўринни эгаллаган иштирокчилар, шунингдек, учинчи ўринда турган энг яхши саккизта жамоа йўл олади. Бундан ташқари, 2026 йилги жаҳон чемпионатида янги босқич — 1/16 финал қўшилади.
Ўзбекистон миллий терма жамоаси ўз тарихида илк бор Жаҳон чемпионати финал босқичига йўлланма олди. Темур Кападзе бошчилигидаги жамоа Абу-Даби шаҳрида Бирлашган Араб Амирликларига қарши баҳс олиб борди ва ўйин 0:0 ҳисобидаги дуранг билан якунланди. Ушбу натижа “оқ бўрилар”га мундиал йўлланмасини қўлга киритиш учун етарли бўлди.
Изоҳ (0)