Украина президенти Владимир Зеленский ҳудудий масалаларни муҳокама қилиш учун Россия президенти Владимир Путин билан учрашишга тайёрлигини айтди. Бу ҳақда у матбуот анжуманида маълум қилди.
Зеленский тегишли баёнотни АҚШ раҳбари Дональд Трамп ва Европа етакчилари билан учрашувдан сўнг эълон қилди. У Россия дастлаб Украина иштирокида икки томонлама учрашув, кейинчалик эса уч томонлама музокара таклиф этганини эслатди.
Биз раҳбарлар даражасидаги ҳар қандай форматга тайёрмиз, дея таъкидлади Зеленский.
Украина президенти ҳудудлар масаласини ўзи ва Путин ўртасида муҳокама қилишни хоҳлаётганини айтди. Шунингдек, уларнинг учрашуви ҳеч қандай шартларсиз ўтказилишини исташини таъкидлади. Зеленский Трамп билан учрашувда харитада кўрсатилган босиб олинган ҳудудлар фоизи устида баҳслашганини ва бу масалада яхши билимга эгалигини қўшимча қилди.
Бундан ташқари, у АҚШга қурол-яроғ бўйича келишув таклиф қилганини ҳам тасдиқлади. Бу пакетда Украинада мавжуд бўлмаган техника — аввало самолётлар, ҳаво ҳужумидан мудофаа тизимлари ва шунга ўхшаш қуроллар бор.
Бизнинг таклифларимиз асосида 90 миллиард долларлик пакет бор, деб қўшимча қилди Украина президенти.
Зеленский чет эл ҳарбий кучлари Украина ҳудудида жойлашиши мумкинлиги ҳақида алоҳида изоҳ берди.
Биз кўнгиллилар коалицияси ҳақида гапиряпмиз, 30 та мамлакат ҳақида суҳбат бўлади, бу мамлакатларнинг ҳар бири амалда нимани таклиф қила олишини аниқлаймиз. Кимдир, эҳтимол, ўз қўшинини юборишга тайёр бўлади. Кимдир разведка билан шуғулланади, бошқаси денгиз хавфсизлиги ёки ҳаво хавфсизлиги бўйича ёрдам беради. Баъзилари конституциявий чекловлар туфайли бевосита иштирок эта олмайди, лекин Украина ишлаб чиқаришини молиялаштиришга қодир, дея тушунтирди у.
Трамп ва Зеленский учрашуви
18 август куни кечқурун Трамп Зеленский ва Европа етакчилари билан музокаралар ўтказди. Очиқ қисм ярим соатдан сал камроқ давом этди. Музокараларда НАТО бош котиби Марк Рютте, Еврокомиссия раҳбари Урсула фон дер Ляйен, Буюк Британия бош вазири Кир Стармер, Франция президенти Эммануэл Макрон, Германия канцлери Фридрих Мерц, Финляндия президенти Александр Стубб, Италия бош вазири Жорж Мелони иштирок этди.
Трампнинг ўзи учрашувни “жуда самарали” деб атади. Унинг сўзларига кўра, томонлар АҚШ билан келишилган ҳолда Европанинг турли давлатлари томонидан тақдим этиладиган Украина учун хавфсизлик кафолатларини муҳокама қилган.
Изоҳ (0)