Ўзбекистонда савдо ва умумий овқатланиш солиқдан қочиш хавфи энг юқори соҳалар бўлиб қолмоқда. Бу ҳақда Солиқ қўмитаси маълум қилди.
Солиқчилар 2025 йил январь июль ойларида солиқ тўламаслик хавфи юқори бўлган 2 минг 519 та корхонада аудит ўтказилган. Мазкур рақам ушбу даврда фаолият кўрсатган жами солиқ тўловчиларнинг (549,3 мингта) 0,4 фоизига тенг.
Қўмита хабарига кўра, ўтказилган текширувларда 1 минг 270 та корхона 15,3 триллион сўмдан ортиқ солиқ базасини яширгани аниқланган. Оқибатда уларга нисбатан 3,1 триллион сўм миқдорида жарима қўлланилган.
Жараёнда аниқланган солиқ хавфи суммаси 7,7 триллион сўм, солиқ аудитида аниқланган миқдор 9,2 триллион сўм бўлган. Яъни кутилганидан ҳам кўп миқдордаги солиқдан қочиш ҳолатлари кузатилган.
Солиқдан қочиш хавфи энг юқори соҳалар — савдо ва умумий овқатланиш бўлган (5,5 триллион сўм). Шу билан бирга, ишлаб чиқариш (1,1 триллион сўм), қурилиш (961 миллиард сўм), хизмат кўрсатиш (641,7 миллиард сўм) соҳаларида улуш нисбатан катта.
Таҳлил қилинишича, мамлакатда 460 та субъектда 4,6 триллион сўмлик сотилган товарлар суммаси кўрсатилмаган. 394 та корхонада 5,1 триллион сўмлик товарлар инвентаризация пайтида омбор ёки реализация жойида мавжуд бўлмаган. Яна 416 та субъектда 5,5 триллион сўмлик кирим қилинмаган товарлар сақланган ёки реализация қилинган.
Қўмита ҳозирда тўлов муддати келган солиқлар миқдори 5 триллион сўм бўлиб, шундан 2,3 триллион сўми (46 фоиз) тўланганини қайд этган.
Таққослаш учун, 2024 йил январь июль ойларида жами 1 минг 226 та тадбиркорлик субъектида солиқ аудити ўтказилган. Аниқланган солиқ хавфи суммаси 2 триллион сўмни, текширув даврида эса 2,9 триллион сўмни ташкил этган. Уларга нисбатан 960,4 миллиард сўм жарима қўлланилган.
Эслатиб ўтамиз, жорий йил 13 августда Солиқ қўмитасининг my3.soliq.uz маълумотлар базасида техник носозлик юз берганди. Оқибатда 30,1 минг солиқ тўловчининг ҳисобидан асоссиз равишда жами 399,3 миллиард сўм маблағ ечиб олинган. Пуллар 14 август куни эгаларига қайтарилган.
Изоҳ (0)