Туркиялик тажрибали мутахассис, 71 ёшли Фотиҳ Терим Ўзбекистон миллий терма жамоаси бош мураббийига айланиши мумкин. Heber Merkezi нашри хабарига кўра, Ўзбекистон футбол ассоциацияси (ЎФА) унга аллақачон расмий таклиф юборган.
Манбага кўра, Терим бу таклифни кўриб чиқиш учун ЎФАдан вақт сўраган. Агар у розилик билдирса, 2026 йил АҚШ, Мексика ва Канада мезбонлик қиладиган Жаҳон чемпионатида “оқ бўрилар”ни туркиялик мутахассис бошқариши мумкин.
Маълумот учун, Фотиҳ Терим Туркия миллий терма жамоаси билан Евро-2008 ва Евро-2016 турнирларида иштирок этган. У Истанбулнинг “Галатасарой” клуби билан УЕФА Кубогини қўлга киритган. Шунингдек, “Фиорентина”, “Милан” ва “Панатинаикос” клубларида ҳам мураббийлик қилган. Бироқ у Жаҳон чемпионатларида иштирок этмаган.
ЎФА ҳозирча шартнома муддати ва маош бўйича тафсилотларни ошкор қилгани йўқ. Аммо Терим розилик билдирса, у дарҳол иш бошлайди ва терма жамоани 2026 йилги Жаҳон чемпионатига тайёрлайди.
Эслатиб ўтамиз, аввалроқ ЎФА германиялик мутахассис Ёахим Лёв билан ҳам музокаралар олиб борган эди. Бироқ Лёв Ўзбекистон терма жамоасини бошқариш истагини билдирмаган.
Изоҳ (0)