Тошкент шаҳрида такси ҳайдовчиси йўловчига, Хоразмда эса эркак танишига шилқимлик қилгани учун жавобгар қилинди. “Дарё” шу ҳақдаги суд ҳужжатлари билан танишди.
Маълум бўлишича, 1998 йилда туғилган фуқаро 2025 йилнинг 29 июнь куни бошқарувидаги Onix’да Тошкент вилоятининг Зангиота туманида яшовчи аёлга такси хизматини кўрсатаётган пайтда унинг юз қисми ва танасининг кўкрак олди қисмига қўлларини теккизиб, шаҳвоний шилқимлик қилган.
Суд мажлисида ҳуқуқбузар тариқасида сўроқ қилинган 27 ёшли эркак ҳақиқатдан ҳам аёл йўловчига хизмат кўрсатганини, аммо унга шилқимлик қилмаганини айтди. Жабрланувчи аёл эса судланувчи ўзини оқлаш учун ёлғон кўрсатма бераётганини, аслида йўлда кетаётганида эркак унинг юзини ушлаб, танасининг кўкрак қисмига тегиб, шаҳвоний шилқимлик қилганини гапириб берди ва унга қонуний жазо берилишини сўради.
Шунга ўхшаш ҳолат Хоразм вилоятининг Урганч шаҳрида ҳам рўй берган.
Урганч шаҳрида яшовчи 38 ёшли эркак танишининг уйига маст ҳолда бориб, унинг уйига меҳмон бўлиб келган аввалдан таниш қўшни аёлга шилқимлик қилган. Унга бунинг учун 1 миллион сўм пул таклиф қилиб, қўлларидан ушлай бошлаган. Аёл унга “қўлларингни торт дея” кўчага чиққанида ортидан чиқиб, кўчада аёлни ҳар хил уятли сўзлар билан ҳақорат қилган.
Суд Тошкент шаҳрида яшовчи ҳайдовчини Маъмурий жавобгарлик тўғрисидаги кодекснинг 41-1-моддаси 1-қисми (шаҳвоний шилқимлик қилиш, яъни шахсга нисбатан унинг учун номақбул бўлган ҳамда унинг шаъни ва қадр-қимматини таҳқирлайдиган, шахснинг ташқи қиёфасини ёки қадди-қоматини тавсифлашда, имо-ишора қилишда, тегинишда, чақиришда ифодаланган, шаҳвоний хусусиятга эга бўлган ҳаракатларни бир марта қўпол равишда ёки бир неча марта содир этиш) билан айбдор деб топган бўлса, Хоразмда яшовчи фуқарони шаҳвоний шилқимлик қилиш билан бирга майда безорликни ҳам амалга оширган деган хулосага келди. Натижада такси ҳайдовчиси 5 суткага, хоразмлик маст эркак эса 7 сутка қамалди.
Изоҳ (0)