АҚШ президенти Дональд Трамп 15 август куни Россия раҳбари Владимир Путин билан Аляскадаги учрашувда ҳудудлар масаласини муҳокама қилмайди. Бу ҳақда манбаларга таяниб, NBC хабар берди.
Трамп Украина президенти Владимир Зеленский ҳам иштирок этган Европа етакчилари билан онлайн-конференцияда шундай ваъда берган. У Путин билан музокараларда “ўт очишни сўзсиз тўхтатиш”га эришмоқчи эканини айтган. АҚШ президенти ва Европа етакчилари келажакдаги ҳудудлар ҳамда тинчлик шартларини муҳокама қилишда Украина иштирок этиши кераклигига келишиб олган.
Баъзи европалик етакчиларда Трамп “Путин билан учрашув натижаларига нисбатан унчалик оптимист эмас” деган таассурот пайдо бўлган. Манбалардан бирига кўра, Трамп АҚШ иштирокида эришилиши мумкин бўлган Украина хавфсизлик кафолатларини қўллаб-қувватлаган.
Путин 6 август куни Кремлда АҚШ президенти махсус вакили Стив Уиткофф билан учрашди. Унда Россия президенти тинчлик келишувига оид шартларини баён қилди: ўт очишни тўхтатиш ва фронт чизиғини ҳозирги позицияларда музлатиш эвазига Украинанинг Донбассдан воз кечиши. Кейинчалик у Херсон ва Запороже вилоятларининг Россия эгаллаб олган қисмларидан воз кечишга тайёр эмаслигини айтди.
Трамп ва Путин ўртасидаги музокара Анкориж шаҳрида бўлиб ўтади. Хавфсизлик талабларига жавоб бериши мумкин бўлган объект эса Элмендорф-Ричардсон ҳарбий базаси ҳисобланади. Учрашув жойини танлашда Европа вариантлари дарҳол рад этилган. Бунга Гаагадаги Халқаро жиноий суд (ХЖС) томонидан Путинни ҳибсга олиш учун берилган ордер сабаб бўлган. Шу билан бирга, Путин ва Трамп билан яқин муносабатда бўлган Венгрия варианти ҳам кўриб чиқилган эди.
Изоҳ (0)