Ўзбекистонда Енгил саноатни ривожлантириш агентлиги ташкил қилинади

Ўзбекистонда тўқимачилик, чарм ва ипак саноатига масъул бўлган Енгил саноатни ривожлантириш агентлиги ташкил қилинади.

13 август куни тўқимачилик соҳасида экспорт имкониятлари ва захираларни ишга солиш масалалари юзасидан президент раислигидаги видеоселектор йиғилишида маълум қилинишича, янги агентликка инвестициялар, саноат ва савдо вазирининг биринчи ўринбосари Нозимжон Холмуродов раҳбарлик қилади.

Агентлик қошида тажрибали тадбиркорлардан иборат кенгаш ташкил қилинади. Агентликнинг алоҳида жамғармаси бўлади, давлат кўмаги, шунингдек тўқимачилик корхоналарига арзон айланма маблағ шу жамғарма орқали берилади. Жамғармага 200 миллион доллар ажратилади.

Янги агентликка кенгаш билан биргаликда тадбиркорлар билан мулоқот қилиб, таннарх, ишлаб чиқариш ва экспорт бўйича ечимлар ишлаб чиқиш, “божхона ҳудудида қайта ишлаш” режими орқали тайёр маҳсулот экспортини икки баробарга ошириш, кооперацияни кучайтириб, паст қувватда ишлаётган корхоналарни соғломлаштириш чораларини кўриш топширилди.

Халқаро консултантлар билан биргаликда тўқимачиликни 2030 йилга қадар ривожлантириш дастурини ишлаб чиқиш ҳамда чарм, ипак ва гиламчилик саноатини ривожлантириш бўйича ҳам таклифларни киритиш вазифаси қўйилди.

“Ҳокимлар, кластерлар ва тўқимачилик корхоналари раҳбарлари бир нарсани билиши керак. Ҳозирги шароитда бюджетга 1 сўм қўшимча тушум қилиш қанча қийин бўлаётганини тушунган тушунади. Бугун айтилган қўллаб-қувватлаш чораларини пулга чақса, 7 триллион сўм бўлади. Энди шунга яраша натижа ҳам бўлиши керак”, деди давлат раҳбари.

Шавкат Мирзиёев жаҳонда савдо қоидаларининг тез ўзгариши ёки логистикадаги узилишлар тўхтамаётгани шароитида тўқимачилик тармоғини ривожлантиришга алоҳида ёндашувлар зарурлигини, шу муносабат билан Енгил саноатни ривожлантириш агентлиги ташкил этилишини айтди.

Ушбу агентликка раҳбарлик қиладиган Нозимжон Холмуродов 2022 йилнинг августидан буён инвестициялар ва ташқи савдо вазирининг биринчи ўринбосари лавозимида ишлаб келаётганди. Ундан аввал Бухоро вилояти ҳокимининг биринчи ўринбосари лавозимида фаолият юритган.