Мексика мамлакатдаги энг қудратли гиёҳвандлик картелларида фаолият юритганликда гумон қилинган 26 нафар маҳбусни АҚШга экстрадиция қилди. Бу ҳақда BBC хабар берди.
Маълум қилинишича, бу 2025 йилда амалга оширилган иккинчи йирик экстрадиция бўлмоқда. АҚШ расмийлари маҳбусларни йирик наркотўдаларнинг асосий аъзолари эканини билдирган. Улар зўравонлик жиноятлари ёки уюшган жиноятчилик билан алоқадорликда айбланмоқда. Мексика ҳукумати эса маҳбусларга жамоат хавфсизлигига доимий таҳдид сифатида қарамоқда.
Маҳбуслар орасида “Жалиско янги авлод” (CJNG) ва “Синалоа” картели аъзолари борлиги тасдиқланган. Уларнинг орасида эса CJNG молиявий бошлиғи, гуруҳ етакчиси Эл Менчо Осегуэра Гарсиянинг қудаси Абигаэл Гонсалес Валенсия (“Эл Куини”) ҳам борлиги айтилмоқда. Шунингдек, Лос-Анжелес округи шериф ўринбосарини ўлдиришда гумон қилинаётган Роберто Салазар ҳам АҚШга жўнатилган. Экстрадиция фақат ўлим жазоси қўлланмайдиган шарт асосида амалга оширилгани таъкидланмоқда — бу Мексика ҳукумати йиллар давомида қатъий риоя қилиб келаётган талаблардан биридир.
Сўнгги масштабли экстрадиция Вашингтоннинг картелларга қарши кескин чоралар кўриш талаблари фонида амалга оширилмоқда. Мексика президенти Клаудия Шейнбаум ўтган ҳафта АҚШнинг мамлакат ҳудудида ҳарбий операция ўтказишини рад этган бўлса-да, ушбу экстрадиция ташаббуси икки давлатнинг фентанил савдосига қарши ҳамкорлиги давом этаётганини кўрсатмоқда.
Маълумот ўрнида, Мексика 2025 йил февраль ойида ҳам АҚШга картелларга алоқадор 29 маҳбусни топширганди. Улар орасида 1985 йилда АҚШ гиёҳвандликка қарши кураш агентлиги ходими Энрике Кики Камаренани ўлдиришда айбланаётган “Гудалахара” картели асосчиларидан Каро Кинтеро ҳам бор эди.
Изоҳ (0)