Андижон аэропорти халқаро рейсларни қабул қилишни қайта тиклади. Бу ҳақда Uzbekistan Airports матбуот хизмати хабар берди.
Маълум қилинишича, март ойида кенг кўламли реконструкциядан сўнг фойдаланишга топширилган Андижон аэропорти 12 август куни ўзининг илк халқаро парвозини амалга оширди. Биринчи йўналиш Flyone Asia маҳаллий авиакомпаниясининг Андижон—Жидда—Андижон йўналиши бўйича ҳафтасига икки марта — сешанба ва пайшанба кунлари амалга ошириладиган мунтазам рейси бўлди. Бортида 151 йўловчи бўлган Q72261 рейси манзилига учиб кетди.
Бугунги кунда Андижондан Тошкентга ҳам мунтазам қатновлар Silk Avia (душанба ва пайшанба кунлари) ва Uzbekistan Airways томонидан (чоршанба ва шанба кунлари) амалга оширилмоқда.
Андижон халқаро аэропорти 2023 йилнинг 1 апрелдан бошлаб аэродром қопламасини реконструкция қилиниши туфайли авиапарвозлар учун вақтинча ёпилганди. Ўша йилнинг сентябрида сентябрида аэропортда янги аэродром мажмуаси қурилишининг биринчи босқичи бошланган эди. 2025 йил 15 март куни ушбу аэропортда аэродром реконструкциясининг биринчи босқичи якунланди. 20 мартдан бошлаб эса мунтазам йўловчи қатновларини қабул қила бошлади.
Изоҳ (0)