Ҳар қандай тадбир ва хизматларда фақат жонли ижрода куйловчи хонанда Юлдуз Турдиева 10 август куни 40 ёшни қаршилади. Шу муносабат билан хонанданинг ҳаёти ва касбий фаолиятига назар соламиз.
“Қўрқоқ қиз бўлганман”
Юлдуз Турдиева 1985 йили Бухоро вилоятида дунёга келган. Оиласида санъаткорлар йўқ бўлишига қарамай, у болаликдан мақом қўшиқларига қизиққан. Хонанда болалиги билан боғлиқ воқеаларни шундай эслайди.
— Эрка қиз бўлганман, ота-онам нима десам ҳам, йўқ дейишмасди. Аммо ниҳоятда қўрқоқ бўлганман. Ҳатто мактабга кетаётганимда йўлимдан мушук чиқиб қолса ҳам, қўрқиб уйга қайтиб келардим. Бу одатлар ҳалигача сақланиб қолган. Шу билан бирга, ниҳоятда меҳрибон ва қўлиочиқ қиз бўлганман. Онам уйимиз ёнида кичик дўконча очган. У ерда шоколад, печенье каби майда-чуйда ширинликлар ҳам сотиларди. Уларни олиб, синфдошларимга тарқатардим. Онам “Шунча шоколад қани? Нима қилдинглар?” деса, индамай тураверардим, дейди хонанда Юлдуз Турдиева.
“15 ёшимгача онам ёнимда бўлган”
Юлдуз Турдиеванинг санъаткор бўлишига қаршиликлар бўлган. Аммо уни биринчи навбатда ота-онаси қўллаб-қувватлаган.
— Санъаткор бўлса, ундай, бундай бўлади, деган гап-сўзлар ҳамиша бўлган. Шу боис яқинларим ҳамиша атрофимда бўлишга, ёмон ниятли одамлардан ҳимоя қилишга ҳаракат қилган. Ўн беш ёшимга қадар онам ҳамиша мен билан бирга бўлган. Ҳеч бир тадбир ёки кўрик-танловга ёлғиз юбормасди. Кейинчалик бу вазифани акам бажарган, ҳозирги кунда эса турмуш ўртоғим мен билан бирга, дейди хонанда.
“Устозимнинг ўғлига кўнгил қўйганман”
Хонанда турмуш ўртоғи билан санъат коллежида ўқигани ва қайнотасидан таҳсил олгани ҳақида сўзлаб берди.
— Турмуш ўртоғим билан тенгдошмиз, у билан Бухоро санъат коллежида бирга ўқиганмиз. Қайнотам иккимизга устозлик қилган, кейин Бухородан бирга Тошкентга келиб, Ўзбекистон давлат консерваториясига ҳужжат топширганмиз. Мен қўшиқ айтардим, турмуш ўртоғим эса довул чаларди. Аммо ҳеч қачон бу инсон билан оила қуришим ҳақида ўйлаб кўрмаганман. Иккинчи курсда ўқиётганимда менга бўлган муносабатлари ўзгараётганини сезиб қолганман. Курсдошлардан рашк қилишни бошлаган. Ёзги таътил кунлари мен Тошкентда қолардим, у қайнотам билан тўй хизматларига чиқиш учун Бухорога кетарди. Икки ой мен учун ниҳоятда оғир ўтганини ҳис қилардим. Чунки Улуғбек энг яқин курсдошим ва ҳимоячим эди. Хуллас, устозимнинг ўғлига кўнгил қўйганман, дейди Юлдуз Турдиева.
“Қишда ойнасиз ижара уйда яшаганмиз”
Юлдуз Турдиева турмуш ўртоғи билан ўртаҳол оилада камол топган. Бундан ташқари, ўша йиллари Тошкентда доимий рўйхатда турмаган инсонларнинг яхши ишга жойлашиши ҳам муаммо эди. Хонанда ҳаётидаги энг оғир кунларни қуйидагича эслайди.
— Турмуш ўртоғим билан Тошкентга келганимизда ҳеч нарсамиз йўқ эди. Ишонасизми, бир йил ичида 10 та ижара уйда яшашимизга тўғри келган. Шароити яхшисининг пули тўғри келмасди. Ёки пули тўғри келганининг шароити қониқарсиз даражада бўларди. Биринчи қаватда деразаси йўқ хонадонда яшаганимиз ҳеч эсимдан чиқмайди. Кимдир кириб келса, нима қиламан, деб тонг отгунга қадар ухлолмасдим. Ҳатто бундай ижара уйга ўғлимни олиб келишга қўрқиб, уни қайнонамга ташлаб келгандим. У пайтларда пропискаси йўқларни яхши ишга олишмасди. Шу боис турмуш ўртоғим билан ишга жойлашишга қийналганмиз. Ҳатто қониқарсиз даражадаги уйни ижарага олишга ҳам пулимиз қолмаганди. Ўшанда турмуш ўртоғимнинг дўстларидан бирининг бир хонали уйига кўчиб ўтгандик. У уйда ўндан ортиқ киши яшаб, битта қозондан овқат ердик, дейди хонанда Юлдуз Турдиева.
“Мени ғолибликка ундаган ҳис — она меҳри”
Ижара уйдаги шароит сабаб боласидан айро яшашга мажбур бўлган хонанда халқаро мусобақага катта миқдордаги мукофот пули қўйилгани ҳақидаги хабарни ўқиб қолади. Оналик меҳри уни танловда иштирок этиш ва ғалаба қозонишга ундайди.
— Боламни соғиниб юрган пайтимда Озарбайжонда ўтказиладиган Байналхалқ муғом фестивали ҳақидаги эълонни ўқиб қолганман. Бош соврин учун 15 минг АҚШ доллари деган жойини ўқиб, кўзларим порлаб кетган. Ўзимча бу пулга уй сотиб олиш ҳақида режалар тузганман.
“Қорабахши” қўшиғи — Озарбайжон юраги дейиларкан. Ўзбекистон давлат консерваториясида ишлайдиган Очил Матжоновдан қўшиқни ўргатишини сўраганман. Ўн икки кун давомида консерваториядан кетмай, қўшиқни ўрганганман. 2009 йили ўтказилган муғом фестивалида ғолиб бўлиб, илк катта мукофотни қўлга киритганман. Тошкентга қайтганимдан кейин уй олиш ҳаракатига тушганман. Ҳаммаси ниятга яраша бўлар экан, ўша пайтда 15 000 АҚШ долларига шаҳар марказидан икки хонали уй берарди. Уй сотиб олиб, оилам билан унга кўчиб ўтганмиз. Бу фестивал ҳаётимга қувонч олиб кирган. Ғолиб бўлишимга эса оналик меҳри сабаб бўлган, дейди хонанда Юлдуз Турдиева.
“Баҳодир Йўлдошевдан танбеҳ эшитганман”
Юлдуз Турдиева “Шарқ тароналари”да қатнашган йили режиссёр Баҳодир Йўлдошевдан танбеҳ эшитгани ва йиғлаб юборган кунларини эслайди.
— “Шарқ тароналари” фестивалига тайёргарлик бир неча ой давом этарди. Илк марта қатнашган йилим бир инсон келиб, фарзандининг тўйида иштирок этишимни қаттиқ илтимос қилган. “Йўқ, бу ердан кетолмайман”, деганман. Аммо у инсон ҳам оёқ тираб туриб олган. Охири репетиция бўлмайдиган вақтга тўйни тўғирлаб, бориб келишни режа қилганмиз. Аксига олиб, ўша вақтда режиссёр Баҳодир Йўлдошев мени излаб қолган экан. Тўйга кетганим ҳақида эшитиб, роса жаҳли чиққан. Менга қаттиқ танбеҳ бериб, фестивалдан ҳам четлаштирмоқчи бўлган. Йиғлаб вазиятни тушунтирганим ҳам фойда бермаган. Фақатгина эртаси куни “Майли, бу сенга охирги огоҳлантириш” деган, дейди хонанда.
Юлдуз Турдиеванинг ноёб қобилияти
Хонанда ноёб хислатли инсонлар тоифасига киради, унда биоток кучли бўлгани учун темир жисмлар унинг танасига ёпишолади.
— Бу қобилият ҳисобланадими, йўқми, билмайман. Қўл ва юзимга қошиқ, санчқилар ёпишади. Бу хислатим борлигини болалигимдаёқ билганмиз, дейди хонанда Юлдуз Турдиева.
“Сиз турмуш ўртоғингиздан кўп пул топасиз”
Юлдуз Турдиева турмуш ўртоғи нега созандалик қилмаётгани ва унга нисбатан негатив фикр билдирадиган инсонларга қуйидагича жавоб берган.
— Илгари тўй ва концертларда турмуш ўртоғим созандалик қиларди. У профессионал ва ўз касбини севадиган инсон эди. Аммо оила қурганимиздан кейин маъмурлик ва созандалик қилиш уни бир оз чарчатиб қўйди. Шундан кейин “Улуғбек, сиз созандалик қилмай, ёнимда бўлсангиз бўлди”, дедим. Чунки маъмурликнинг ҳам бош оғриқлари кўп. “Сиз турмуш ўртоғингиздан кўп пул топасиз”, деб унга нисбатан негатив фикр билдираётганлардан ранжийман. Чунки одамлар билан ишлаш қийин, агар у маъмурлик қилмаганида, мен бемалол қўшиқ айтолмаган бўлардим, дейди Юлдуз Турдиева.
Изоҳ (0)