Баъзи аёллар шоу-бизнесга илк қадамини қўйганида, уларнинг кейинчалик биринчи хоним мақомига кўтарилишини ҳеч ким тасаввур қилмаган. Улар аввал саҳнада қўшиқ куйлаш ёки моделлик билан машҳур бўлишди. Бугун эса бу аёллар нафақат санъатда, балки жамиятда ҳам биринчи хоним сифатида ҳурматга сазовор.
Карла Бруни-Саркози
Италян-француз модели Карла Брунининг Никола Саркози машҳурлигига қўшган ҳиссаси катта ва ибратлидир. Айнан у ўз вақтида француз сиёсатига мода ва “юлдузлик”ни қайтарди. Бу эса Клод Помпиду давридан бери Республикада бутунлай йўқолган деб ҳисобланган эди. Президентнинг учинчи рафиқаси бежиз “янги Жеки Кеннеди” деб таърифланмаган. Бруни-Саркози хоним дарҳол протокол ва сиёсий урф-одатлар талабларини тушуниб етди. У замонавий ватанпарварлик нуқтайи назаридан кийиниш услубини бутунлай қайта кўриб чиқди, хайрия ишлари билан шуғулланди ҳамда муҳим ижтимоий ва сиёсий баёнотлар билан эҳтиёткорона чиқишлар қилди.
Бруни мусиқачилар оиласида туғилган бўлиб, ёшлигидан ижодни танлаган. Мактабни тугатгач, Карла архитектор бўлишни режалаштирган, бироқ – келишган қадди-қомати туфайли – ҳеч қандай маълумот олмай, моделлик фаолиятини бошлаган: у City Моdes билан шартнома имзолаганида атиги 19 ёшда эди. Guess’даги дебюти Dior, Givenchy, Chanel, Yves Saint-Laurent ва бошқа кўплаб нуфузли брендлар билан ҳамкорликка айланди.
Карла Брунининг мусиқа соҳасидаги фаолияти ҳам жуда муваффақиятли бўлди: миллионлаб нусхада сотилган альбомлар, мукофотлар, гастроллар - собиқ биринчи хоним ҳозир ҳам мусиқа билан шуғулланиб келмоқда. Бундан ташқари, у Елисей саройига кўчиб ўтганидан кейин ҳам бу фаолиятини тўхтатмади. Президент рафиқаси лавозимидаги дастлабки йилида у “Cоmmе si dе rien nъétаit” номли альбомини чиқарди (сотувдан тушган даромад хайрия ишларига йўналтирилди). 2011 йилда эса Франциянинг биринчи хоними Вуди Аллен фильмида рол ижро этди.
Маълум маънода, Карла президент эридан ҳам машҳурроқ эди, ҳатто бугунги кунда ҳам у мусиқий фаолиятини давом эттирмоқда.
Мелания Трамп
Дональд Трамп билан машҳурликда беллашиш қийин — аслида, унинг учинчи рафиқаси Мелания АҚШнинг биринчи хоними бўлган бўлса-да, ҳеч қачон бунга интилмаган. Шундай бўлса-да, энг мустаҳкам имижни айнан шоу-бизнес шакллантиради. Шу сабабли таниқли магнат сайловларда номзодини қўйганида, рафиқасини алоҳида таништириш шарт эмасди: АҚШда Мелания аллақачон етарлича машҳур эди.
Мелания, моделлик карьерасини орзу қилиб, ёшлигидаёқ она шаҳри Люблянани тарк этган. У Словенияда ҳали бола пайтидаёқ маҳаллий болалар кийимлари кўргазмаларида иштирок этган, 16 ёшида эса илк бор профессионал фотосессияда ўзини синаб кўрган.
Албатта, бўлажак биринчи хоним Карла Бруни каби машҳур бўлмаса-да, карьераси анча муваффақиятли кечган: моделлик агентлиги билан шартнома тузган, кўргазмаларда қатнашган, машҳур журналлар учун суратга тушган ва ҳатто гўзаллик танловида ҳам иштирок этган.
Аслида Мелания АҚШга келишни ўйламаган ҳам, Европада уни Дональднинг кўп йиллик дўсти Паоло Замполли пайқаб қолган. У Меланияни Нью Йоркда модел сифатида таништирмоқчи бўлган ва охир-оқибат словениялик қизни Трамп билан учраштириб қўйган. Шундан сўнг Дональднинг таъсири ҳам қўшилди: ўзи гўзал аёл бўлган Мелания энди Америка шоуменининг ҳамроҳига айланди.
Трамп хотинининг моделлик соҳасида карьерасини ҳар томонлама қўллаб-қувватлади. Натижада GQ журналида машҳур фотосессия, обрўли журналлар муқовалари ва ҳатто Мелания иштирок этган телерекламалар юзага келди. Кейинчалик Трамп хонимнинг шахсий косметика линияси ва заргарлик тўпламлари яратилди. Шу боис аёлни бутун дунё билмаса-да, Америка жамияти ўзининг бўлажак биринчи хонимини у Оқ уйга расман кўчиб ўтишидан анча олдин яхши танирди.
Софи Грегуар-Трюдо
Ёшлигида Софи реклама агенти ва фотомодел сифатида ишлаган бўлса-да, унинг иштиёқи доимо журналистика бўлган. У маҳаллий радио ва телевидение мактабини тугатгач, янгиликлар бўлимида қисқа муддат ишлагандан сўнг, дарҳол LCN телеканалида карьерасини бошлаган.
Грегуар медиа ва кўнгилочар саноатда оддий шахс эмасди, акс ҳолда уни Mercedes-Benz хайрия балида бошловчи сифатида таклиф қилишмаган бўларди. Ўшанда Софининг ҳамкасби унинг келажакдаги турмуш ўртоғи ва бўлажак бош вазир Жастин Трюдо бўлиб чиқди. У ҳам таниқли шахс, лекин ҳали юлдуз даражасига етмаган эди.
Пен Лиюан
Пен Лиюаннинг машҳурлигини, унинг турмуш ўртоғи, ҳозирда ХХР раиси Си Цзиньпиннинг обрў-эътибор қозонишига кўп жиҳатдан сабаб бўлди, десак хато бўлмайди. Улар ёшликдаёқ учрашиб, бир-бирларига муҳаббат қўйган. Ўша пайтда йигит сиёсатда эндигина илк қадамларини қўяётган, Пен эса аллақачон Хитой эстрадаси юлдузи эди.
Хитойнинг бўлажак биринчи хоними ижодкор оилада дунёга келган. Қизнинг сопрано овози дастлабки оҳанглардан бошлаб тингловчиларни мафтун этарди. Қизнинг онаси ўз даврида анъанавий хитой операсида куйлаган бўлса, Пеннинг ўзи ҳарбий қўшиқларга эътибор қаратди. Чунки ўша пайтда Хитой Халқ Республикасида айнан ҳарбийлар энг яхши концерт майдонларини, энг зўр олқишларни ва, шубҳасиз, давлатнинг тўлиқ қўллаб-қувватлашини қўлга киритишарди. Қиз 18 ёшида Хитой Халқ-озодлик армиясига кирди. Натижада ёш хонанда деярли барча давлат тадбирларида чиқиш қилиб, ватанпарварлик қўшиқларини ижро эта бошлади.
Пен Хитой халқининг севимли хонандаси бўлиб, мамлакатда ҳеч қайси биринчи хоним Си Цзиньпиннинг рафиқасидек бунчалик қизиқиш билан кузатилмаган. Айтишларича, Си Цзиньпин сиёсий карьерасини хотинининг ғоят машҳурлигидан фойдаланиб қурган. Шубҳасиз, бундай таниқли шахснинг турмуш ўртоғи учун халқ ишончини қозониш қийин бўлмаган.
Ненси Рейган
Анна Френсис Роббинс — Ненси Рейган номи билан танилган, кўплаб турли ролларни ижро этган. Унинг онаси театр ва кино актрисаси бўлиб, ҳатто Кетрин Хепберн билан дўстона муносабатда бўлган. Шу сабабли ёш Ненси драма факультетига ўқишга киради.
Рейган хоним хотираларига кўра, онасининг машҳур дўстлари кўплаб ёш юлдузчалар юқори чўққиларга эриша олмай, оддий официант бўлиб қолишини айтиб уни огоҳлантирган. Тўғри, Ненсининг Голливуд А рўйхатига киришга эришди деб бўлмайди, бироқ у официант ҳам бўлмади.
Кўплаб танқидчилар Ненсининг истеъдодли бўлмаганини таъкидлашади. Бироқ унда бошқа маҳорат бор эди: у фойдали алоқалар ўрнатиш ва суҳбатдошларни мафтун этишни уддаларди. Голливуд унга орзу қилган карьерасини бермаган бўлса-да, уни бўлажак турмуш ўртоғи билан таништирди. Ўша пайтда Ненси кино оламига кириб келаётган, Роналд Рейган эса Киноактёрлар уюшмаси президенти эди.
Турмушга чиққанидан сўнг, Ненси кинони тарк этади ва фақатгина кичик саҳна асарлари ҳамда кўрсатувларда кўриниб, оиласини биринчи ўринга қўяди. Бироқ эр-хотин бир марта, 1957 йилда “Денгиз жодугарлари” фильмида бирга суратга тушишади. Фильмда улар бош ролларни ижро этган.
Изоҳ (0)