Ba’zi ayollar shou-biznesga ilk qadamini qo‘yganida, ularning keyinchalik birinchi xonim maqomiga ko‘tarilishini hech kim tasavvur qilmagan. Ular avval sahnada qo‘shiq kuylash yoki modellik bilan mashhur bo‘lishdi. Bugun esa bu ayollar nafaqat san’atda, balki jamiyatda ham birinchi xonim sifatida hurmatga sazovor.
Karla Bruni-Sarkozi
Italyan-fransuz modeli Karla Brunining Nikola Sarkozi mashhurligiga qo‘shgan hissasi katta va ibratlidir. Aynan u o‘z vaqtida fransuz siyosatiga moda va “yulduzlik”ni qaytardi. Bu esa Klod Pompidu davridan beri Respublikada butunlay yo‘qolgan deb hisoblangan edi. Prezidentning uchinchi rafiqasi bejiz “yangi Jeki Kennedi” deb ta’riflanmagan. Bruni-Sarkozi xonim darhol protokol va siyosiy urf-odatlar talablarini tushunib yetdi. U zamonaviy vatanparvarlik nuqtayi nazaridan kiyinish uslubini butunlay qayta ko‘rib chiqdi, xayriya ishlari bilan shug‘ullandi hamda muhim ijtimoiy va siyosiy bayonotlar bilan ehtiyotkorona chiqishlar qildi.
Bruni musiqachilar oilasida tug‘ilgan bo‘lib, yoshligidan ijodni tanlagan. Maktabni tugatgach, Karla arxitektor bo‘lishni rejalashtirgan, biroq – kelishgan qaddi-qomati tufayli – hech qanday ma’lumot olmay, modellik faoliyatini boshlagan: u City Models bilan shartnoma imzolaganida atigi 19 yoshda edi. Guess’dagi debyuti Dior, Givenchy, Chanel, Yves Saint-Laurent va boshqa ko‘plab nufuzli brendlar bilan hamkorlikka aylandi.
Karla Brunining musiqa sohasidagi faoliyati ham juda muvaffaqiyatli bo‘ldi: millionlab nusxada sotilgan albomlar, mukofotlar, gastrollar - sobiq birinchi xonim hozir ham musiqa bilan shug‘ullanib kelmoqda. Bundan tashqari, u Yelisey saroyiga ko‘chib o‘tganidan keyin ham bu faoliyatini to‘xtatmadi. Prezident rafiqasi lavozimidagi dastlabki yilida u “Comme si de rien n’était” nomli albomini chiqardi (sotuvdan tushgan daromad xayriya ishlariga yo‘naltirildi). 2011-yilda esa Fransiyaning birinchi xonimi Vudi Allen filmida rol ijro etdi.
Ma’lum ma’noda, Karla prezident eridan ham mashhurroq edi, hatto bugungi kunda ham u musiqiy faoliyatini davom ettirmoqda.
Melaniya Tramp
Donald Tramp bilan mashhurlikda bellashish qiyin — aslida, uning uchinchi rafiqasi Melaniya AQShning birinchi xonimi bo‘lgan bo‘lsa-da, hech qachon bunga intilmagan. Shunday bo‘lsa-da, eng mustahkam imijni aynan shou-biznes shakllantiradi. Shu sababli taniqli magnat saylovlarda nomzodini qo‘yganida, rafiqasini alohida tanishtirish shart emasdi: AQShda Melaniya allaqachon yetarlicha mashhur edi.
Melaniya, modellik karyerasini orzu qilib, yoshligidayoq ona shahri Lyublyanani tark etgan. U Sloveniyada hali bola paytidayoq mahalliy bolalar kiyimlari ko‘rgazmalarida ishtirok etgan, 16 yoshida esa ilk bor professional fotosessiyada o‘zini sinab ko‘rgan.
Albatta, bo‘lajak birinchi xonim Karla Bruni kabi mashhur bo‘lmasa-da, karyerasi ancha muvaffaqiyatli kechgan: modellik agentligi bilan shartnoma tuzgan, ko‘rgazmalarda qatnashgan, mashhur jurnallar uchun suratga tushgan va hatto go‘zallik tanlovida ham ishtirok etgan.
Aslida Melaniya AQShga kelishni o‘ylamagan ham, Yevropada uni Donaldning ko‘p yillik do‘sti Paolo Zampolli payqab qolgan. U Melaniyani Nyu Yorkda model sifatida tanishtirmoqchi bo‘lgan va oxir-oqibat sloveniyalik qizni Tramp bilan uchrashtirib qo‘ygan. Shundan so‘ng Donaldning ta’siri ham qo‘shildi: o‘zi go‘zal ayol bo‘lgan Melaniya endi Amerika shoumenining hamrohiga aylandi.
Tramp xotinining modellik sohasida karyerasini har tomonlama qo‘llab-quvvatladi. Natijada GQ jurnalida mashhur fotosessiya, obro‘li jurnallar muqovalari va hatto Melaniya ishtirok etgan telereklamalar yuzaga keldi. Keyinchalik Tramp xonimning shaxsiy kosmetika liniyasi va zargarlik to‘plamlari yaratildi. Shu bois ayolni butun dunyo bilmasa-da, Amerika jamiyati o‘zining bo‘lajak birinchi xonimini u Oq uyga rasman ko‘chib o‘tishidan ancha oldin yaxshi tanirdi.
Sofi Greguar-Tryudo
Yoshligida Sofi reklama agenti va fotomodel sifatida ishlagan bo‘lsa-da, uning ishtiyoqi doimo jurnalistika bo‘lgan. U mahalliy radio va televideniye maktabini tugatgach, yangiliklar bo‘limida qisqa muddat ishlagandan so‘ng, darhol LCN telekanalida karyerasini boshlagan.
Greguar media va ko‘ngilochar sanoatda oddiy shaxs emasdi, aks holda uni Mercedes-Benz xayriya balida boshlovchi sifatida taklif qilishmagan bo‘lardi. O‘shanda Sofining hamkasbi uning kelajakdagi turmush o‘rtog‘i va bo‘lajak bosh vazir Jastin Tryudo bo‘lib chiqdi. U ham taniqli shaxs, lekin hali yulduz darajasiga yetmagan edi.
Pen Liyuan
Pen Liyuanning mashhurligini, uning turmush o‘rtog‘i, hozirda XXR raisi Si Szinpinning obro‘-e’tibor qozonishiga ko‘p jihatdan sabab bo‘ldi, desak xato bo‘lmaydi. Ular yoshlikdayoq uchrashib, bir-birlariga muhabbat qo‘ygan. O‘sha paytda yigit siyosatda endigina ilk qadamlarini qo‘yayotgan, Pen esa allaqachon Xitoy estradasi yulduzi edi.
Xitoyning bo‘lajak birinchi xonimi ijodkor oilada dunyoga kelgan. Qizning soprano ovozi dastlabki ohanglardan boshlab tinglovchilarni maftun etardi. Qizning onasi o‘z davrida an’anaviy xitoy operasida kuylagan bo‘lsa, Penning o‘zi harbiy qo‘shiqlarga e’tibor qaratdi. Chunki o‘sha paytda Xitoy Xalq Respublikasida aynan harbiylar eng yaxshi konsert maydonlarini, eng zo‘r olqishlarni va, shubhasiz, davlatning to‘liq qo‘llab-quvvatlashini qo‘lga kiritishardi. Qiz 18 yoshida Xitoy Xalq-ozodlik armiyasiga kirdi. Natijada yosh xonanda deyarli barcha davlat tadbirlarida chiqish qilib, vatanparvarlik qo‘shiqlarini ijro eta boshladi.
Pen Xitoy xalqining sevimli xonandasi bo‘lib, mamlakatda hech qaysi birinchi xonim Si Szinpinning rafiqasidek bunchalik qiziqish bilan kuzatilmagan. Aytishlaricha, Si Szinpin siyosiy karyerasini xotinining g‘oyat mashhurligidan foydalanib qurgan. Shubhasiz, bunday taniqli shaxsning turmush o‘rtog‘i uchun xalq ishonchini qozonish qiyin bo‘lmagan.
Nensi Reygan
Anna Frensis Robbins — Nensi Reygan nomi bilan tanilgan, ko‘plab turli rollarni ijro etgan. Uning onasi teatr va kino aktrisasi bo‘lib, hatto Ketrin Xepbern bilan do‘stona munosabatda bo‘lgan. Shu sababli yosh Nensi drama fakultetiga o‘qishga kiradi.
Reygan xonim xotiralariga ko‘ra, onasining mashhur do‘stlari ko‘plab yosh yulduzchalar yuqori cho‘qqilarga erisha olmay, oddiy ofitsiant bo‘lib qolishini aytib uni ogohlantirgan. To‘g‘ri, Nensining Gollivud A ro‘yxatiga kirishga erishdi deb bo‘lmaydi, biroq u ofitsiant ham bo‘lmadi.
Ko‘plab tanqidchilar Nensining iste’dodli bo‘lmaganini ta’kidlashadi. Biroq unda boshqa mahorat bor edi: u foydali aloqalar o‘rnatish va suhbatdoshlarni maftun etishni uddalardi. Gollivud unga orzu qilgan karyerasini bermagan bo‘lsa-da, uni bo‘lajak turmush o‘rtog‘i bilan tanishtirdi. O‘sha paytda Nensi kino olamiga kirib kelayotgan, Ronald Reygan esa Kinoaktyorlar uyushmasi prezidenti edi.
Turmushga chiqqanidan so‘ng, Nensi kinoni tark etadi va faqatgina kichik sahna asarlari hamda ko‘rsatuvlarda ko‘rinib, oilasini birinchi o‘ringa qo‘yadi. Biroq er-xotin bir marta, 1957-yilda “Dengiz jodugarlari” filmida birga suratga tushishadi. Filmda ular bosh rollarni ijro etgan.
Izoh (0)