Россия армияси Украина ҳудудидаги Озарбайжон объектларига “мақсадли ҳаво ҳужуми” уюштирмоқда. Бу ҳақда Озарбайжон президенти Илҳом Алиев Украина раҳбари Владимир Зеленский билан телефон суҳбатида маълум қилди.
Сиёсатчилар 10 август куни Озарбайжон билан боғлиқ инфратузилмага зарба берилаётганини муҳокама қилди. Бундай объектлар қаторида Озарбайжоннинг SOCАР компаниясига қарашли нефть омбори ҳам киради.
Президентлар Россиянинг Озарбайжонга тегишли бошқа объектлар, жумладан, Украинага газ етказиб берувчи газ компрессор станциясига уюштирган мақсадли авиаҳужумларини қоралади. Бу ҳеч қандай тарзда Озарбайжон ва Украина ўртасидаги энергетика соҳасидаги ҳамкорликнинг тўхтатишига олиб келмаслигига ишонч билдирилди, дея таъкидлайди Илҳом Алиевнинг матбуот хизмати.
6 августга ўтар кечаси Россия дронлари Одесса вилоятидаги “Орловка” газ компрессор станциясига ҳужум қилди. Бу станция орқали Озарбайжон Украинага газ етказиб беради. Украина Энергетика вазирлиги ҳужум “фақат фуқаролик инфратузилмасига, мақсадли равишда энергетика соҳасига ва бир вақтнинг ўзида Озарбайжон, АҚШ ҳамда Европадаги ҳамкорлар билан муносабатларга қарши” йўналтирилганини таъкидлади.
8 августга ўтар кечаси Россия Қуролли кучлари Одесса вилоятидаги Озарбайжоннинг SOCАР давлат нефть компанияси омборига “Shahed” дронлар билан ҳужум уюштирди.
Оқибатда ёнғин чиқиб, дизель ёқилғиси қувурига зарар етди. Россиялик “ҳарбий мухбир” Владимир Романовнинг таъкидлашича, ўша тунда Одесса вилоятида йўқ қилинган нишонлар орасида Нерубайское қишлоғидаги “Свитанок Оил Trade” нефть омбори ҳам бўлган.
SOCАР июль ойи охирида Украинанинг “Нафтогаз“ компаниясига газ етказиб бериш бўйича биринчи шартномани имзолагани маълум бўлганди.
Изоҳ (0)