“Калмар ўйини” сериалининг суратга олиш жараёни кутилмаган ечимлар, ноодатий ёндашувлар ва қизиқарли тафсилотларга тўла. Режиссёр Хван Дон Хек раҳбарлигидаги шоу ижодкорлари визуал услуб устида қандай ишлагани, актёрларни қандай танлагани ва ваҳимали, бироқ ўзига тортувчи ўйин оламини қандай яратгани ҳақида сўзлаб берамиз.
Хван Дон Хек сюжетни суратга олиш бошланишидан 10 йил олдин ўйлаб топган
“Калмар ўйини”нинг тарихи бутун дунёга машҳур бўлишидан анча олдин бошланган. Режиссёр ва сценарий муаллифи Хван Дон Хек лойиҳа ҳақида дастлаб 2008 йилда — ўзи молиявий қийинчиликларга дуч келган пайтда ўйлаган. Ўшанда ночор аҳволга тушиб қолган ва пул учун яшаб қолишга мажбур бўлган одамлар ҳақидаги ғоя унга долзарб туюлган.
Хван нафақат шахсий тажрибасидан, балки комикслардан ҳам илҳомланган. У сценарий ёзган, аммо узоқ вақт давомида лойиҳани амалга оширишга тайёр бўлган студияни топа олмаган. Жанубий кореялик продюсерлар воқеани кенг томошабинлар учун ҳаддан ташқари қайғули ва шафқатсиз деб баҳолашган.
Лойиҳа Netflix эътибор қаратмагунча ўн йилдан ортиқ вақт давомида чанг босиб ётган. Хваннинг айтишича, айнан стриминг платформаси сюжетда замонавий муаммолар аввало, ижтимоий тенгсизлик ва синфий кураш аксини кўрган.
Дастлаб “Калмар ўйини” фильм сифатида суратга олиниши режалаштирилган
Хван Дон Хек “Калмар ўйини”ни тўлиқ метражли фильм сифатида яратишни режалаштирган. Ғоя ўша-ўша: ҳаётда умидсизликка тушганлар катта пул мукофоти учун ҳаёт-мамот ўйинига киришади. Бироқ йиллар ўтиб лойиҳа амалга ошириш имкониятига эга бўлгач, Хван уни сериал форматига мослаштирмоқчи бўлди. Бу қарор унга кўпроқ ижодий эркинлик берди.
Кенгайтирилган вақт туфайли у сюжетни чуқурроқ ишлаб чиқишга, синовларни янада хилма-хил ва шиддатли қилишга, шунингдек, янги сюжет чизиқларини қўшишга муваффақ бўлди. Масалан, махфий тергов олиб бориб, ўйинга кириб олган полициячи Хван Чун Хо образи сценарийда умуман йўқ эди. Унинг саргузаштлари ҳикояга қўшимча зўриқиш даражасини қўшди ва ўйин жараёнининг парда ортидаги томонини кўрсатишга имкон берди.
Режиссёр декорация ғояларини болалик хотираларидан олган
“Калмар ўйини”нинг асосий визуал ғояларидан бири Хван Дон Хекнинг шахсий носталгиясидан келиб чиққан. У болалик тасаввурларини — ўйин майдончаларини, ёрқин рангларни, оддий шаклларни қайта жонлантириб, ташқи кўринишдан содда дунё ва қаҳрамонлар дуч келадиган шафқатсиз синовлар ўртасидаги қарама-қаршиликни яратишга қарор қилди. Бундай визуал усул томошабинлардаги хавотирни кучайтирарди: болаликдан таниш бўлган декорациялар жанг майдонига айланиб қоларди.
Жамоа ҳар бир ўйин майдонини деярли нолдан бошлаб қурди. Компьютер графикасидан минимал даражада фойдаланиб, асосан қўл меҳнати билан ишланди. Катта ёшли актёрлар ўзларини жуда катта ва кутилмаган дунёдаги болалар каби ҳис қилишлари учун барча майдончалар улкан ўлчамларга кенгайтирилди. Режиссёрнинг айтишича, бу нафақат керакли муҳитни яратишга, балки актёрларнинг янада самимий ва ҳис-туйғуга тўла ижросига эришишга ҳам ёрдам берган.
3-мавсумда Кейт Бланшетт билан биргаликдаги саҳна алоҳида суратга олинган
“Калмар ўйини”нинг учинчи мавсумида мухлисларни кутилмаган ҳамкорлик — Голливуд юлдузи Кейт Бланшетт билан биргаликдаги саҳна кутаётган эди. Бироқ кутилганидан фарқли ўлароқ актёрлар Ли Бен Хон ва Бланшетт алоҳида-алоҳида суратга тушишди.
Ли Бен Хон Кейтни узоқдан кузатиб турди, сўнгра иккаласи ҳам тезда суратга олиш майдончасини тарк этишга мажбур бўлди. Бундай алоҳида суратга олиш жадваллардаги мураккабликлар ва логистика муаммолари билан изоҳланади, аммо экрандаги тасвир жуда табиий чиққан.
“Калмар ўйини” сериали бюджети
2021 йилда эфирга узатилган биринчи мавсум тахминан 21,4 миллион АҚШ долларига тушган. Жанубий Корея бозори учун бу аллақачон жиддий молиявий муваффақият эди. 2024 ва 2025 йилларда намойиш этилган иккинчи ва учинчи мавсумлар анча катта маблағ — 68,9 миллион АҚШ доллари миқдорида молиялаштирилди. Бюджетнинг бундай ўсиши нафақат лойиҳанинг кўламини, балки бутун дунё бўйлаб томошабинларнинг улкан қизиқишини ҳам акс эттиради.
Натижада “Калмар ўйини” Жанубий Кореянинг энг қиммат теледастурларидан бирига айланди ва унга сарфланган маблағлар ҳар бир янги мавсумда бир неча баробарга ўзини оқлади.
Изоҳ (0)