АҚШ президенти Дональд Трамп 3 август куни мамлакатдаги дори воситалари нархларини 1 200 фоиздан 1 500 фоизгача пасайтиргани ҳақида маълум қилди. Бироқ мутахассислар буни математик жиҳатдан имконсиз эканини таъкидламоқда. Бу ҳақда Associated Press хабар берди.
Таъкидланишича, Трамп бу ҳақда журланистларга ўз интервьюсида маълум қилган.
“Биласизми, биз дори нархларини 1200, 1300, 1400 ва ҳатто 1500 фоизгача камайтирдик. 50 фоиз эмас, мен 1500 фоиз ҳақида гапиряпман”, деган Трамп.
Мутахасислар Трампнинг бу баёноти мутлақо ёлғон эканини айтмоқда. Билдирилишича, дори нархининг 100 фоиздан кўпроққа арзонлашуви истеъмолчиларга харид учун пул тўлашга тенгдир, яъни фармацевтика компаниялари беморларга пул тўлайди дегани. Бу эса бутунлай имконсиз ҳолат.
АҚШдаги Жанубий Калифорния университети Схаффер маркази соғлиқни сақлаш сиёсати директори Жоффри Жоис бу даъвони “бутунлай уйдирма” деб баҳолаган.
“Агар бу ҳақиқат бўлганида, фармацевтлар ўзлари эълон қиларди”, деди у.
Жон Хопкинс университети профессори Мариана Сокал эса Трампнинг “бу математикасини изоҳлаш жуда қийин” эканини айтган.
Оқ уй вакили Куш Десаи АҚШ фуқаролари бошқа ривожланган давлатларга қараганда дорилар учун кўпроқ тўлашини тан олган. Лекин Трамп айтган 1500 фоизлик қисқариш бўйича ҳеч қандай аниқ далил келтирмаган.
Трамп дори компанияларига “энг қулай нарх” моделини жорий этиш бўйича хат юборганини таъкидламоқда. Бу моделда дорилар АҚШда бошқа давлатлардагидек энг арзон нархларда сотилиши керак бўлади. Аммо бу ташаббус ҳали амалда эмас — президент унинг келгуси 2-3 ойда йўлга қўйилишини маълум қилган.
Аксарият дори нархлари Қўшма Штатларда бошқа ривожланган давлатларга нисбатан юқорироқ. Сабаби мамлакатда нархлар ҳукумат томонидан эмас, балки бозор механизмлари орқали белгиланади.
Изоҳ (0)