Тошкентда 2 нафар шахс ташкилот идорасидан ичида 560 минг АҚШ доллари бўлган сейфни ўмариб кетди

Тошкент шаҳрининг Миробод туманида 2 нафар шахс ташкилот идорасидан ичида 560 минг АҚШ доллари бўлган сейфни ўмариб кетди. Бу ҳақда пойтахт ИИБнинг “Тезкор тасвир” ахборот дастурида хабар қилинди.

Қайд этилишича, жорий йилнинг 21 июнидан 22 июнга ўтар кечаси, тахминан соат 02:20 да Тошкент шаҳрининг Миробод туманида икки нафар фуқаро ташкилот идорасига кириб, у ердан сейфни ўғирлаб кетган.

Талончилар уни деразадан кўчага улоқтириб, Gentra русумли автомобилига ортишган. Шундан сўнг, сейф фуқаролардан бирининг хонадонига олиб келиниб, махсус ускуна ёрдамида кесиб очилган. Пулларни олгач, гумонланувчилар далилларни яшириш мақсадида уни пойтахт ҳудудидан оқиб ўтувчи каналлардан бирига улоқтириб юборган.

Маълумотларга кўра, сейф ичида пуллардан ташқари, 2 та флешка ва турли ҳужжатлар бўлган.

Олиб борилган тезкор тадбирлар натижасида ўғриликни содир этганларнинг шахсига аниқлик киритилди. Фуқаролардан бири Қирғизистонга қочишга уринган, бироқ Андижондаги меҳмонхонада қўлга тушган.

Гумонланувчиларда 440 минг АҚШ доллари ҳамда сейфдан олинган пулларга харид қилинган янги Honda мототцикли борлиги аниқланди.

Мазкур ҳолат юзасидан Ўзбекистон Республикаси Жиноят кодексининг 169-моддаси (ўғрилик) билан жиноят иши қўзғатилди.