Словения ҳукумати 31 июль куни Исроилнинг қурол-яроғ экспорти, импорти ва транзитига эмбарго қўйганини маълум қилди. Бу қарор билан мамлакат Ғазо уруши фонида Исроил қуролларига чеклов ўрнатган Европадаги илк давлат бўлди. Бу ҳақда Daily Sabah хабар берди.
Бош вазир Роберт Голоб ҳукумат йиғилишидан сўнг бу чеклов ҳақида эълон қилар экан, Европа Иттифоқи ичидаги келишмовчиликлар сабабли Словения бу масалада мустақил тарзда ҳаракат қилишга қарор қилганини таъкидлаган.
“Ғазо секторида инсонлар ёрдамдан атайлаб маҳрум қилинаётгани боис ҳалок бўлмоқда. Бундай вазиятда ҳар бир масъул давлат чора кўриши керак — бошқалардан олдин бўлса ҳам,” дейилади баёнотда.
Маълум бўлишича, Словениянинг ўзи ҳам 2023 йил октябрь ойидан буён, яъни Ғазода уруш бошланганидан бери Исроилга ҳарбий техникалар етказиб беришни тўхтатган.
Маълумот учун, Словения 2024 йилнинг июнь ойида Фаластин давлатини расман тан олган. Шунингдек, мамлакат июль ойида 2 нафар исроиллик вазирни “persona non grata” (номақбул шахс) деб эълон қилиб, уларнинг Словенияга киришини тақиқлаган. Вазирлар геноцидга ундовчи баёнотлар берганликда айбланган. Словения ва Исроил ўртасида илк бора 1992 йилда дипломатик алоқалар ўрнатилганди.
Изоҳ (0)