Сўз устаси Аваз Охун Миллий телеканалининг “Аёл қалби” кўрсатувига интервью берди. У суҳбат давомида эркаклар ҳам йиғлаши, концертидаги таъсирли гаплари сабаб оилалар ажрим ёқасидан қайтгани, Instagram сабаб оилалар ажрашаётгани ва аёлини қандай тушуниши ҳақида гапирди.
“Эркак ҳам йиғлайди”
— Эркак киши ҳам йиғлайди, у ҳам одам. Аёллар ошкора йиғлайди, лекин бу эркакка ярашмайди. Биз яшириб, кўрсатмай йиғлаймиз. Охирги марта нега йиғлаганим эсимда йўқ, ука-сингилларим, жигарларимнинг тўйини кўрсам ҳам йиғлаб юбораман. “Худойим, қандай кунларни кўрмаган эдик, бугун шу кунларга етказдинг” дея, ва албатта, кўнгил бўшлигидан бу ҳам. Жуда ошкора йиғламасангиз ҳам ўпкангиз тўлади. Бу бахт кўз ёшлари бўлади. Лекин шукр-ки, азобдан, аламдан йиғламадик.
Аллоҳ қайси бандасига кўп берса, шундан кўпроқ сўраб ҳам олади. Ота-она деймиз-у, лекин барибир номардлигимиз бор. Ота-онамиз яшаётган уйдан ўзимизнинг уйимиз ҳашаматлироқ, улар минаётган машинадан ўзимизники яхшироқ, дейди сўз устаси.
Аёл севиб қолса қандай бўлади?
— Юқорида айтганимни тескариси-да, аёл ошкора, эркак пинҳона йиғлайди дедим-ку. Аёл киши пинҳона севади, эркак киши ошкора севади. Фарқи мана шунда. Биз эркаклар бор гапимизни айтиб қўямизу, лекин аёллар ич-этини еб, куйиб, адойи тамом бўлса ҳам билдирмай ушлаб туради. Қаттиқ севса ҳам билдирмайди.
Аёлни севиш керакми ёки тушуниш? Уни севиш керак. Севсангиз қолган ҳаммани шунинг соясида кетаверади, дейди Аваз Охун.
Аваз Охуннинг рафиқаси хафа бўлса ва мен яхшиман деса, қизиқчи буни қандай тушунади?
— Эр-хотин бирга яшагани сари бир-бирини тушуниб қолади. Ҳар бир гапи, нима хоҳлаётгани, арази қай вақтгача давом этишигача биласиз. Аёл кишига сен ҳақлигингни ҳеч қачон исботлаб беролмайсан. У доим ҳақ. Ҳақ бўлса ҳам, ноҳақ бўлса ҳам, ҳақ. Эркак буни тушуниши ва тан олиши керак, тамом. Биринчи бўлиб узр сўраш эркакнинг вазифаси, деб ўйлайман. Уйда ҳам, хато қилсангиз, албатта, кечирим сўрайсиз.
Аёлнинг меҳри инсон туғилганидан то вафот этгунга қадар давом этади. Орада ҳеч қачон узилиш бўлмайди. Эркак аёлнинг меҳрисиз яшолмайди. Туйғуларсиз яшашни мен яшаш деб ҳисобламайман, дейди сўз устаси.
“Концертим сабаб ажрим ёқасида турганлар ярашган”
— Концертимда ажралишлар ҳақида гапирганимда кўзимга ёш келган, шунда бир гап айтгандим. “Кўпинча оила бузилишига ота-она ҳам сабаб бўлиб қолади. Аёллардан, эримни яхши кўрардим, яшардим, қайнонам яшатмади, онам қўймади, деган гапларни эшитиб қоламиз. Баъзида шундай ҳам бўлади”, деб монологим орасида гапирдим. Концерт тугатиб чиқсам, бир аёл йиғлаяпти, кўзи тўла ёш. Мени кутиб турган экан. “Концертингизга кулиш учун келгандим, мени йиғлатдингиз”, деди. Мен нима қилдим десам, “Ўғлим келинимни олиб, рўзғорини алоҳида қилиб чиқиб кетди. Мен билан яшамади”, деяпти. Уни гапларидан мен ўзимни айбдордек ҳис қилиб юбордим. Аввало гапларим таъсир қилганидан хурсандман, лекин бу гапни ҳамма учун айтгандим дедим.
Ўша концертимдан кейин ажрим ёқасида турган аёллар эрига, эрлар аёлига қўнғироқ қилганлар бўлган.
Аёлим бир кун сартарошхонага борганида, аёлларнинг ўзаро гапини эшитиб қолибди. “Аваз Охуннинг концертига киргандим, оила, ажримлар ҳақида гапирган эди, эримга телефон қилиб, эртаси куни ярашиб олдим”, дебди. Шу нарсалар учун ҳам яшагим келади. Битта болани етим қилишдан, оилани ажрашиб кетишидан сақлаб қолиш ҳам ижод қилишга куч беради, дейди қизиқчи.
“Бизнинг эркаклар ҳол сўрашдан аввал овқат сўрайди”
— Бемеҳрлик, хиёнат, эътиборсизлик — шундай хатоларни аёл киши кечирмаслиги мумкин. Аёл ширин сўзга эриб кетади, лекин эркак шуни ҳам айтолмаса нима қилиб юрибди. Руслар ёки бошқа бошқа Европа халқларида эркаклар аёлини ўпиб ишга кетади, келганида ҳам яхши ўтирибсанми деб ўпиб қўяди. Бизни эркаклар эса аёлини кўрса нима овқат қилдинг, дейди. Нега шундай? Аввал аҳволини сўра, эркалат, гул кўтариб кел ёки юзидан ўпгин-да, кейин сўра нима овқатлигини. Менимча бу бизга ота-боболаримиздан мерос бўлиб қолган.
Аёллар орзу-ҳавасга берилувчан. Бир аёл Instagram’да ўтириб, бахтсиз бўлиб қолдим деди. Бу энг оғир дард. Бахтини кўз-кўз қиладиганлар бор. Эрим мана шундай гул олиб келди, бундай машина олиб берди, эрим, эрим… Ҳаммада ҳам имконият йўқ-да. Аёллар фалончидан қаерим кам дейди. Шунинг ортидан ажрашиб кетаётганлар ҳам оз эмас, дейди сўз устаси.
“Эркак аёлнинг азобини ўндан бирини ҳам ҳис қилмайди”
— Эркак бу ҳаётда аёл чеккан азобнинг ўндан бирини ҳам чекмаса керак. Бола дунёга келтиришнинг ўзи эркак ўз ҳаётида кўрган-кечирганини бир томонга суриб қўя олади. Бу жуда катта жараён. Фарзанд аёлнинг вужудида пайдо бўлганидан бошлаб, дунёга келтириб тарбия қилгунигача бўлган жараёнда аёлнинг азоби, меҳнати, умуман шу воқеликнинг ўзи эркакнинг бутун бошли азобини бир четга суриб, ютиб қўя оладиган даражада, дейди у.
Изоҳ (0)