Ерда инсониятнинг одатий ҳаёт тарзига, денгиз ўсимликлари ва ҳайвонот дунёсига ҳамда глобал экотизимларга хавф туғдирадиган иккита янги иқлим мавсуми пайдо бўлди. Бу ҳақда Daily Mail нашри хабар қилмоқда.
Маълум қилинишича, Лондон иқтисодиёт ва сиёсий фанлар мактаби олимлари томонидан олиб борилган тадқиқот давомида шундай хулосага келинган.
Халқаро тадқиқотчилар гуруҳи огоҳлантиришича, глобал иқлим тақвимига инсон фаолияти туфайли юзага келган иккита янги мавсум — тутун мавсуми ва чиқинди мавсуми аллақачон мустаҳкам ўрнашиб олган. Бу ҳодисалар экотизимларни издан чиқармоқда, миллионлаб одамлар саломатлигига хавф туғдирмоқда ва аллақачон ҳар йилги ҳодисага айланиб улгурган.
Таъкидланишича, тутун мавсуми ҳар йили июндан сентябргача жануби-шарқий Осиёни қамраб олади. Бунинг асосий сабаби Индонезия ва Малайзияда қишлоқ хўжалиги мақсадлари учун тропик торфзорларнинг оммавий ёндирилишидир. Тутун қўшни давлатларга, жумладан, Сингапур ва Таиландга тарқалиб, ҳаво сифатининг ёмонлашишига ва касалликларнинг кўпайишига олиб келмоқда. Шунга ўхшаш ҳодисалар қишда Ҳиндистоннинг шимолида кузатилади, у ерда ҳосил қолдиқларини ёқиш Дивали байрами билан бир вақтга тўғри келади. АҚШда илгари фақат ёзда бўладиган ўрмон ёнғинлари мавсуми энди баҳорда бошланиб, декабргача чўзилмоқда.
Чиқиндилар мавсуми Балида декабрдан мартгача кузатилади, бу пайтда муссон шамоллари ва океан оқимлари пляжларга тонналаб пластик чиқиндиларни олиб келади. 2025 йилда бир мавсумнинг ўзида 3 минг тоннадан ортиқ чиқинди тўпланган. Бундай ҳолатлар Филиппин, Таиланд ва АҚШнинг шарқий қирғоқларида, айниқса ёзда, кучли ёмғирлар ва дарё оқими пластикни океанга олиб кетганда қайд этилган.
Изоҳ (0)